Füruğ Fərruxzad. Şeirlərindən seçmələr

”Və yaralarımın hamısı eşqdəndir ” deyən Füruğ bir avtomobil qəzasında öldü.

CÜT

Axşam çökür

Və axşamdan sonra qaranlıq

Və qaranlıqdan sonra

Gözlər,

əllər,

nəfəslər, nəfəslər və nəfəslər…

 və şırnaqdan damcı – damcı tökülən

suyun səsi…

Sonra

Iki qırmızı nöqtəsi

Yanan iki siqaretin…

Saat əqrəblərinin səsi…

Və iki ürək

Və iki tənhalıq.

(Yenidən Doğuluş)

GÜNAH

Günaha batdım; zövq dolu bir günaha

Titrəyən və şəhvətli bir bədənin yanında.

Tanrım! Nə bilim neylədim mən,

o qaranlıq və səssiz guşədə.

O qaranlıq və səssiz guşədə

Baxdım onun sirr dolu gözlərinə.

İstək dolu gözlərinin yalvarışı ilə

Qəlbim taqətsiz titrədi köksümdə.

O qaranlıq və səssiz guşədə

Pərişan yanında oturdum.

Dodağından həvəs töküləndə dodaqlarıma

Divanə ürəyimin kədərindən qurtuldum.

Bir eşq nağılı pıçıldadım qulağına:

Səni istəyirəm ey sevgili.

Səni istəyirəm ey qoynu cənnət guşəsi,

Səni ey divanə aşiqim, səni…

Arzu alovlandı gözlərində,

qırmızı şərab rəqs etdi qədəhdə.

Yumşaq yatağın ortasında bədənim

Məstanə titrədi köksü üstündə.

Günaha  batdım; zövq dolu bir günaha

isti, atəşli bir qucaqda.

Günaha işlədim yandırıb yaxan,

kin tutan, dəmirdən qollar arasında.

(Divar)

BİR ANLIQ

Hələ nə qədər getməliyəm görən

bir diyardan başqa bir diyara?

Gedə bilmərəm. axtara bilmərəm hər zaman

eşqi və başqa bir sevgilini.

Biz kaş iki qaranquş olaydıq

bir bahardan başqa bir bahara

ömrümüz boyunca uçan.

Ah, çox gecdir artıq

Üstümə çöküb elə bil

ağır bir buludun qapqara parçaları.

Öpüşünə bulananda

Dodaqlarımın üstündə adətən

Canagəlir bir anlıq ətir.

Elə bulanıb ki, qəmli eşqim yox olmaq

Qorxusuna

Titrəyir bütün varlığım sənə baxanda.

Bir pəncərədən

yarpaq dolu sevgili ağacıma,

xəzan sarısının atəşinə baxan kimi…

Axarsuyun üstündə sürüşüb gedən

qarışıq bir təsvirə baxan kimi…

Gecə və gündüz

Gecə və gündüz

Gecə və gündüz

Qoy

unudum.

Nəsən sən bir andan,

Gözlərimi şüur vadisində açan

bir andan başqa?

Qoy

unudum.

Tərcümə: Oktay Hacımusalı