Çox illərin söhbətidir. Əlifin tələbə olduğu vaxtlar idi. Kasıbçılığın üzü qara olsun. Ailədə on bir uşaq idilər. Təkcə atası Mirzəbala işləyirdi. O, ailənin yavan çörəyini də güclə çatdırırdı. Əlif qəbul imtahanlarını verməyə gedəndə Mirzəbala kişi ona demişdi: “Oğul, bir bax ha, səninçin çətin olacaq. Kimə arxayın olub Bakıya gedirsən? Arxanda fərli inkanı olan atan yox, vurub-tutan dayın, əmin yox. Nəylə dolanacaqsan, nə yeyib, nə içəcəksən?!
Mən buradakıları güclə dolandırıram. Qalıb kənddə işləsəydin, həm özünə gün ağlayardın, həm də ailəyə köməyin dəyərdi.
Əlif atasının narahatlığına son qoymaq üçün dedi:
– İnstituta girsəm, təqaüd alacağam...
Bunu eşidən Mirzəbalanın gözünə sanki işıq gəldi:
– Çalış təqaüdə düşəsən ki ac qalmayasan, oğul. Gümanımız ona qalır.
Mirzəbala kişi elə bilirdi oxuyanlara bir fərli təqaüd verirlər. Nə isə, heç olmamaqdan cüzi təqaüdə də şükür.
Əlif atasının sözlərini qulağında sırğa eləmiş, oxumağa güc vermişdi. Başqa əlacı və gümanı da yox idi.
Yataqxanada qalırdı. Otaqda dörd nəfər idilər. Adama beş-üç manat qoyub, kartofdan, vermişel və makarondan qızardıb, sup, borş, qayğanaq bişirib bir təhər günlərini başa vururdular. Yataqxanada illik yaşama haqqı o zamanlar cəmi on yeddi manat idi. Bu on yeddi manatı Mirzəbala kişi ödəyir:
– Qalanı sənin öz boynuna, oğul, – deyirdi. –Mənim gücüm bundan başqa ildə bir köynəklə bir ayaqqabıya çatar. 3-4 ildən bir də bir təhər ucuz kostyum ala bilərəm, vəssalam. Məni başa düş. Suçu babayam. Kənd yeridir, əlavə gəlirim yox, nə maaş verirlər, ona da qane oluram. Belə-belə işlər... Oxu, bəlkə gələcəkdə qardaş-bacılarına da bir gün ağladın.
Əlif belə çətin şəraitdə təqaüdün hesabına təhsil alır, bir qarın tox, bir qarın ac dolanırdı. Nə qədər çətinliyi olsaydı belə, başqasına ağız açmaz, borc almazdı. Bircə təqaüd gecikəndə halı fəna olurdı.
Qar yağırdı. Ətraf ağ örtüyə bürünmüşdü. Amma sakit hava idi. Əlif dəmiryolu vağzalının yanındakı köşkə yaxınlaşıb növbəyə dayandı. Cibindəki xırda pulları əli ilə yoxlayıb, necə deyərlər, maddi durumunu ölçüb-biçdi. İki qutab alıb yedi və yoluna düzəldi. Tələsdiyindən büdrədi, az qala yıxılacaqdı. Zor-bəla ilə özünü saxladı, amma ayaqqabısı daşa dəydiyindən zədələndi və qabaq hissədən altlıq aralandı. Əlif deyindi:
– İşə düşmədik.
Ayaqqabı köhnə olduğundan islanan kimi, onsuz da su buraxırdı. Amma ayağı, corabları islansa da, Əlif bir təhər gününü başa vurur, çulunu sudan çıxarırdı. Altlıq aralananda isə yerimək də olmur.
Əlif ayaq saxladı. Özünü avtobus dayanacağına verdi. Hava soyuq olduğundan buraya çoxlu adam yığışmışdı. Bir təhər özünə yer eləyib, ayaqqabılarını, sonra da corablarını çıxartdı. Ayaqqabılarını geyinib üstündən də corablarını çəkdi. Corab ayaqqabılarının altlığını sıxdığından yeriyə bilirdi.
Ayaqqabı əməliyyatı onun vaxtını aldı və mühazirəyə gecikdi. Fəqət mühazirəyə girməməkdən girməyi üstün tutaraq, içəri keçdi.
Qara Bəhramın mühazirəsi idi. Qara Bəhramı hamı yaxşı, savadlı ali məktəb müəllim kimi tanıyırdı. Professor mühazirəyə gecikdiyinə görə əvvəlcə Əlifi danlamaq, hətta otaqdan çıxartmaq istədi. Lakin onun əyin-başına baxıb fikrindən daşındı. Əlif paltosuz idi. Belə soyuq havada nazik köynək və pencək geyinmişdi. Daha betəri isə, ayaqqabılarının görünüşü idi.
Bütün bunlar onun gün-güzəranı barədə aydın təsəvvür yaradırdı.
Qara Bəhram soruşdu:
– Ay bala, bu necə geyinməkdir? Tələsdiyindən corabın üstündən ayaqqabı yox, ayaqqabının üstündən corab geyinmisən.
Əlif aydınlıq gətirdi:
– Müəllim, onları dəyişik salmamışam. Gecikməyimə bais bu ayaqqabılar oldu. Altı qopduğundan corabla yerini dəyişdim ki, heç olmasa, yeriyə bilim.
Qara Bəhram ona əyləşməyə icazə verdi:
– Yaxşı, keç otur. Dərsdən sonra kafedraya, yanıma gələrsən.
Qara Bəhram mühazirəyə davam etdi. Amma fikirli görünürdü:
Dərslər başa çatdı. Əlif kafedraya yollandı. Qara Bəhram bir dəstə markanı ona uzadaraq:
– Orduya, donanmaya və aviasiyaya könüllü yardım cəmiyyətinin markalarıdır. Bizə veriblər ki, tələbələrə paylayıb pulunu yığaq. Sənə tapşırığım – onları satıb pullarını topla. Bildin?!
– Bildim.
Bir müddət ötdü. Əlif markaları satıb yüz manat yığmışdı. Pulu götürüb Qara Bəhramın yanına gəldi:
– Professor, tapşırığınıza əməl elədim, - dedi.
Qara Bəhram laqeyd halda:
– İndi başım qarışıqdır. Qoy səndə qalsın, sonra verərsən.
Əlif pulları göz bəbəyi kimi qoruyurdu. Çalışırdı ki, oğurlatmasın. Alt paltarının içəri qatında cib tikmişdi. Orada gizlədirdi. Oğurlanma ehtimalı yox idi. Yatanda da pullar onunla idi. Bir həftə sonra yenidən Qara Bəhrama yaxınlaşdı. Professor Əlifi görən kimi danışmağa macal verməyib:
– Ay oğul, – dedi, – yadıma düşdü. Sən demə, o markaların pulunu ödəmişəm. Get özünə bir dəst kostyum, bir cüt də ayaqqabı al.
Əlif nəsə demək istədi, Qara Bəhram imkan vermədi. Əli ilə işarə etdi ki, onun dediyini yerinə yetirsin. Qara Bəhramın zəhmi ağır olduğundan Əlif bir söz deyə bilmədi və məsələni başa düşdü. Əslində Qara Bəhram özünə əyin-baş almaq üçün ona pul vermək istəyirmiş, lakin bu təklifin Əlifin xətrinə dəyəcəyindən ehtiyatlanıb, markaları bəhanə gətiribmiş.
Akif Abbasov,
pedaqoji elmlər doktoru, professor, Pedaqoji və
Sosial Elmlər Akademiyasının həqiqi üzvü,,
Azərbaycan Yazıçılar Birliyinin üzvü
Комментариев нет:
Отправить комментарий