Vətən nədir?

Tural Balabəyli

Vətən nədir?

Vətən uğrunda çarpışmaq,

haqsızlığa baş qaldırmaqdır.

Məzlum üçün döyüşməkdir.

Vətəni sevmək həm də

mənliyindən əl çəkənləri,

mənfəətini üstün tutanları

oyandırmaqdır.

Gözəl günlərə inanmaqdır vətən! 

Əyrini doğrudan ayırmaq

haqqı nahaqqın pəncəsindən

almaqdır vətəni sevmək.

Vətən gözlərini üfüqə dikmək

sevgilini düşünməkdir...

Uğrunda ölümlərə gedib gəlməkdir.

Vətən hər şeyə baxmayaraq bir olmaqdır,

insan olmaqdır.

Sənə güvənərək əmanət edilən

namusdur vətən! 

Vətəni qorumaq,

sərhəd boylarında sülhü arzulamaqdır,

yalın ayaqlarınla, qabarlı əllərinlə

xoş günə çıxmaq,

o günü qorumaqdır

vətən...

Sabaha sahib çıxmaqdır,

müstəqil olmaqdır,

halalca qazanmaqdır-

və bir parça çörəyi paylaşmaqdır vətən!