Tural Adışirin - Dedim dağlar mənə qar payı saxlar

BİLƏYDİM NƏDƏNDİ

Elə hey gələndi,gedəndi yollar
İnsanlar elə hey tələsir,qaçır
Ancaq sonralardan xəbərin ola
Deməyin şairlər durub fal açır

Biləsən ha yanda yolların uçrum
Biləsən on addım,yüz addım qabaq
Kimin bərəsinə düşəcək ovun
Kimlər qismətindən qala yapacaq

Biləsən tülkünün bəyliyi haçan
Biləsən nədəndi bu olacaqlar
İnana biləsən ömründən uçan
Günlərin geriyə qayıdacaqlar


Bəxtinə yazılan o hansı qızdı
Biləsən lap elə doğulan günü
Gözlərim neçə yol yolunu azdı
Yalqız gecələrə çəkdi ömrümü

Qardaş irəlidi axı qarından
Axı bu dünyada ağ elə ağdı
Adam var doymadı yerin varından
Uçalıb göyün də südünü sağdı

Hardasa sevgilər ağ günə çıxdı
Hardasa sevinc var-ağlağan uşaq
Mən bir vaxt gözümü torpağa sıxdım
Yerində bənövşə bitmədi ancaq

Dedim dağlar mənə qar payı saxlar
Bulaqlar səsimə səs verər mənim
Biləydim nədəndi bu olacaqlar
Biləydim hayana yan alır gəmim.

DÜNYANIN YERİYƏN AĞACLARIYIQ

Dünyanın yeriyən ağaclarıyıq
Bahara həmişə çatar əlimiz
Dünyanın yeriyən ağaclarıyıq
Bir yaşıl yarpaqdır hər əməlimiz

Palıdlar da bir az əfəldir hələ
Onların yanında çox zirəyik biz
Dumanl,buludlu gündə də belə
Düşər yer üzünə düşər kölgəmiz

Bizim başımıza çıxmaq çətindir
Sallaşan tapılar ətəyimizdən
Bizi gövdəmizdən yıxmaq çətindir
Ancaq yıxılarıq ürəyimizdən

Torpaqda da olsa ayaqlarımız
Kök atıb qalxarıq əllərimizdən
Ağzı günə qalar budaqlarımız
Ağlımızda yuva qurular bəzən

Necəki,necəki dik dayanarıq
Yanarıq,olsa da dörd yanımız buz
Elə ağaclarıq höyüş yanarıq
Dünya yığışsa da yanmaz qurumuz