Sıradakılardan biri

Gənc yazar Mir Bağır “TEZ-BAZAR”da

- Özünüzü 2 sözlə təqdim edin.

- Mir Bağır.

- Sizi necə təqdim edəndə razı qalırsınız?

- Sadəcə özüm kimi.

- “Mən kiməm?” sualına necə cavab verirsiniz?

- Sıradakılardan biri.

- Dost…

- O sarıdan işlər pis deyil.

- İlk sevginiz?

- Güldürmə sən canın.

- Əsas ixtisasınız?

- Arxeoloq-goreşən.

- İstifadə etdiyiniz nəqliyyat növü?

- Çox vaxt ayaqlarım, lazım olanda marşrut.

- Sevdiyiniz maşın markası?

- Porşe.

- Sevdiyiniz brend?

- Çoxdu.

- Sevdiyiniz saç düzümü?

- Basməmmədi.

- Sevdiyiniz rəng?

- Göy. Tanrının rəngidi. Bəs sən nə fikirləşdin?

- Ən çox bəyəndiyiniz ölkə və şəhər?

- Türkiyə, İstanbul.

- Sevdiyiniz yemək?

- Yarpaq dolması. Üzüm ha!

- Ən çox istifadə etdiyiniz söz?

- Olmadı.

- Leksikologiyanıza yad olan söz?

- Məcəllə.

- Sizi nə həyacanlandıra bilər?

- Sükut.

- Ən çox sevdiyiniz kitab?

- “Qorio Ata”.

- Ən çox sevdiyiniz yazar?

- Yazıçı, yoxsa yazar? Yazardısa İbrahim Fərhadoğlu.

- Ən çox bəyəndiyiniz ifaçı?

- Sezen Aksu.

- Ən çox bəyəndiyiniz musiqi janrı?

- Baxır əhval-ruhiyyəyə.

- Özünüzdə qeyri-adi istedad hiss edirsizmi?

- Fit çala bilirəm.

- Mənfi xüsusiyyətiniz?

- Əsəbləşirəm.

- İdeal insan necə olmalıdır?

- Zərdüşt kimi.

- Özünüzü ideal insan hesab edirsizmi?

- Mənfi xüsusiyyətlərim mane olur.

- Sizi özünüzdən nə çıxarda bilər?

- Hansısa gicdırnağa verdiyim salamı almaması.

- Həyat fəlsəfənizi ifadə edin.

- Veni, vidi, viki. (Gəlmək, görmək, qələbə çalmaq).

- Siz xoşbəxtsinizmi?

- Xeyr. Alınmayıb.

- Bədbəxtliyin xüsusi düsturu varmı?

- Aşiq olmaq.

- Hər şeyin sonu üçün əvvəlinə münasibətiniz necə olur?

- Son qanunauyğunluqdur, necə olursa olsun.

- Ölüm niyə ölmür?

- Söz ölmür heç zaman.

- Dinlərə münasibətiniz?

- Dindar deyiləm, amma islam ən mükəmməlidir.

- Kimdən və nədən xilas olmaq istərdiniz?

- İçimdəki şeytandan və güzgüdən.

- Falçıya inanırsızmı?

- Azərbaycanda hər üç nəfərdən biri falçılığa qurşanıb. 

- Daş olmaq yaxşıdır, yoxsa daşlaşmaq?

- Heç biri, amma çox heyf ki get-gedə ikisindən də oluruq.

- Sevinciniz nə qədərdir?

- Lap az, iynənin ucu qədər.

- İnsanların hansı xüsusiyyətlərinə dəyər verirsiniz?

- Düzlüyünə və kişi kimi düşmənçiliyinə.

- Bağlayıcılardan çoxmu istifadə edirsiniz?

- N qədər. 

- Çayı içmək ürəyinizcədir, yoxsa keçmək?

- Əvvəllər çayı keçmək idi. Çayımız qurudu.

- Gülməyi xoşlayırsız, yoxsa güldürməyi…

- Deyəsən heç birini bacarmıram.

- Mənə sualınız.

- Yormadım səni?

- ...

Tural Türk               merkez.az