21 dekabr barədə düşüncələr

Şərqin Əhmədov

Məlum olduğu kimi son vaxtlar dünyannın sonu ilə bağlı söz-söhbətlər səngimək bilmir. Nə qədər təkziblər edilsə də xeyri olmur. Hətta, məşhurlar da təlaşlanıblar və təlaşlarını mətbuatdan gizlədə bilmirlər. Diqqətimi çəkən məqam da elə bu oldu-əvvəllər bir çox hadisələrdə olduğu kimi, qiyamətin gələcəyiylə də əlaqədar yaranmış ehtimallara rəsmi təkzib veriləndən sonra sakitlik müşahidə olunurdusa, indi tamamilə əksi baş verir. Qiyamət söhbəti getdikcə daha da yayılır, qiyamətə hazırlıq görənlərin sayısa artmağa başlayıbdır. Bu məqamda bir el məsəli yadıma düşdü: “Od olmayan yerdən tüstü çıxmaz”.

Elə bu məsəllə də fikirləşməyə başladım ki görəsən burdakı “od”-daha dəqiq də “yanan material” nədir belə, bu qədər tüstüsü də oldu. Riyaziyyatdan başım çıxmasa da ilk öncə diqqətimi çəkən rəqəmlər oldu. Hesablayıcı maşına müraciət edib, verəcəyi cavabı gözlədim. Hesablayıcı maşının verdiyi cavabların bəzisi isə doğrudan da qəribə oldu (daha orasını deyə bilmərəm, hesablayıcı maşın nə qədər doğru cavab veribdir, çünki, mən riyaziyyatçı deyiləm, yanlış cavablarınsa babalı kalkulyatorun boynuna).
5, 6, 13 kimi rəqəmləri əsas götürərək hesablamaya başladım (çünki, bu rəqəmlərin birincisi müqəddəs sayılan günün, iki və üçüncüsü isə nəhsliyin simvolu kimi yozulur və zamanın, vaxtın daim irəli getməsinə görə toplamadan (+) istifadə etdim).

On ikinci ayın iyirmi biri:
12+21=33.
Burdakı iki üçün cəmi isə altı edir (3+3+6),-artıq, “yanan materialın” biri üzə çıxmışdı. Digərlərini axtarmağa başladım.
Iki min on ikinci il, iyirmi bir dekabr-bu rəqəmləri tək-tək toplayandan sonra alınan nəticə:
2+0+1+2+2+1+1+2=11.
On bir rəqəmini altıya vuranda isə altmış altı edir (11x6=66).
Bundan başqa 2012-ci ilin 21 dekabrı 5-ci, yəni cümə gününə təsadüf edir. Islam dini inancındakı bəzi rəvayətlərə görə qiyamət məhz cümə günü gələcəkdir.
11 və 6 rəqəmlərini yanaşı düzəndə 116 olur, 116-ı isə 5-ə vuranda 580 alınır (116x5=580), 580 rəqəmindəki 5 və 8-in cəmi isə 13 edir (5+8=13).  (başqa variantda da 13 alınır (11+6=17x5=85, 8+5=13).

Yuxarıdakı rəqəmlərə və faktlara baxandan sonra məndə sadəcə olaraq, belə fikir yarandı:
Nəsə ola bilər. Axı, dinlər də gerçəkləmək fikrinə düşübdür-biri nəhs rəqəmlər, digəri müqəddəs saydığı günlə (amma, bunu da qeyd etmək lazımdır ki, bəzi İslami inancla 2012-ci ilin 21 dekabrında gələcək qiyamət ziddiyət təşkil edir. Çünki, İslam dinindəki bəzi inanca görə qiyamətin gəldiyi vaxt insanların böyük əksəriyyəti Allaha, eləcə də qiyamətə inanmayacaqlar və qiyamət də onları gözlənilmədən yaxalayacaqdır. Indi isə tam fərqli mənzərə vardır-insanlar qiyaməti gözləyirlər).
Nə olacaq, nə baş verəcək-bunu demək çox çətindir. Dünya ya dövlət əhəmiyyətli hadisə ola bilər. Məs: hal-hazırda davam edən üçüncü dünya mühabirəsi sona çata və ya daha da şiddətlənə bilər. Yaxud, hansısa dövlətlər arasındakı ərazi iddialarına birdəfəlik son qoyulacaqdır-ya həll olunacaq, ya həll olunmayacaqdır.
Zəlzələ nəticəsində bir ya bir neçə ölkə yerin dibinə gedə bilər, və ya, zəlzələ nəticəsində yerin altından yeni torpaqlar üzə çıxa bilər. Şoranlıqlar yaşıllaşa, vadilərsə şoranlığa dönə bilər.
Kiminsə təpəsinə daş və ya pul düşə bilər. Kiminsə cəmi bircə gündə cinsi dəyişə, kimininsə başında gerçəkdən buynuz çıxa bilər. Hansısa insan heyvana, heyvansa insana çevrilə bilər. Bəşəriyyət üçün əvəzsiz kəşf edilə bilər, yaxud bəşəriyyət üçün daha təhlükəli kəşf edilə bilər (qırıcı silah, zəhər və s. kimi). Fərziyyə kimi çox şey mümkündür, hətta, ən ağlagəlməz hadisələri də fərziyyə kimi demək mümkündür.
Bəlkə də elə baş verməli hadisələr baş veribdir, amma, 21 dekabrda üstü açılacaqdır. Bunu demək çətindir.
 Bir şey də diqqətimi çəkdi ki, 2000-ci ildə də, 2010-cu ildə də qiyamətin gələcəyiylə bağlı söhbətlər yaranmışdı (düzdü, indiki kimi geniş əhatəli olmamışdı, amma, insanlarda narahatlıq yaratmışdı) və həmin illərdən sonra dünyadakı fəlakətlərin sayı artmışdı. (2000-ci ildən sonra 11 sentyabr, birləşmiş koalisiya qüvvələrinin əvvəl Əfqanıstan, sonrasa İraqa basqını, Məhəmməd peyğəmbərin karikaturaları, 2010-cu ildən sonra isə Yaponiyadakı faciələr, yenə də başda gələn birləşmiş koalisiya qüvvələrinin (ad köhnə olsa da iştirakçılar elə əvvəlkilər idi) ərəb ölkələrinə hücumu-bunu bizə “Ərəb baharı” kimi də sırımağa cəhd edirlər, Türkiyə-PKK münasibətlərinin heç vaxt olmadığı dərəcədə gərginləşməsi, geylərlə lezbiyanların ifrat dərəcədə çoxalaraq dünyanı “zəbt etməsi” və belə insanların əməllərinin yavaş-yavaş adi hala çevrilməyə başlaması və s. kimi). Məsələyə bu məntiqlə yanaşsaq, belə çıxır ki yenə də dünyadakı fəlakətlər, müharibələr, eləcə də xoşagəlməz hallar tüğyan edəcəkdir. Üstəlik, nəzərə alanda ki qarşıdan nəhs rəqəmi özündə birləşdirən il-2013 (13) gəlir, demək vəziyyətin düzələcəyinə dair ehtimal yoxdur.
 21 dekabr həm də dinlərin mübahisəsinə son qoya bilər. Xristianlığa görə dünyanın sonunda İsa peyğəmbər, İslama görəsə imam Mehdi zühur edəcəkdir.
Xristianlğa görə İsa peyğəmbər zühur etdikdən sonra yer üzündə xristianlığı yayacaqdır-bu baş verə bilər, çünki, xristianların aşkar üstünlüyü vardır. Ona görə ki, xristian mənşəli dövlətlər müsəlman ölklərindəki diktatorları çökdürməklə müsəlmanların gücünü bir qədər zəiflətməyə nail olubdur. Amma, İslam dini də belə desək “çıxış yolu” tapıbdır. Islama görə imam Mehdi müsəlmanların çətin günündə zühur edərək müsəlmanları xilas edəcəkdir və bundan sonra yer üzündə İslam dinini quracaqdır-bu da baş verə bilər. Hal-hazırda bir çox müsəlman dövlətləri doğrudan da çətin günlər yaşayırlar. Əksəriyyətində müharibələr, kimisində də terrorçulardır. Kimisinə də xarici dövlətlərdən aramsız təzyiqlər vardır. Belə vəziyyətdə mövcud vəziyyəti-yəni İslami din mühitini qoruyub saxlamaq şansı 50/50-yədir.
Bu da mümkündür ki, 21 dekabr tarixində hər kəsin öz “xilaskarı” zühur edəcəkdir. Yəni, xristianlar İsa peyğəmbərin, müsəlmanlar isə imam Mehdinin zühur etdiyini iddia edəcəklər. Beləcə... dinlər mühabirəsi daha da qızışacaqdır (ayrıseçkilik-filan etmirəm, amma, yəhudilik barəsində heç bir bilgim olmadığına görə bu dindən nəsə yazmadım və bunun bir səbəbi Azərbaycan dilindən başqa bir dil bilməməyimdirsə, digər səbəbi yəhudi dini mətnlərinin bizim dilə tərcümə və nəşr edilməməsidir (yaxud, bu kitablar, mətnlər o qədər azdır ki, mənim kimilər üçün ümumiyyətlə əlçatmazdır). Ona görə belədir ki, müsəlmanlarla yəhudilər arasında da ədavət vardır. Siz heç Türk dilində də Tövrat və ya digər yəhudi dini mətnlərinə rast gəlməzsiniz. Olanlar da ki ciddi mənada işə yaramırlar).
 Insanlardan başqa təbiət də dəyişir. Əvvəllər yaz, yay, payız, və qış fəsilləri öz vaxtında gələr, öz vaxtında da gedərdi. Ind bunlar da dəyişib. Yadımdadır, məktəbdə oxuduğum vaxtlarda, yaz tətilindən sonra (o vaxtlar yaz tətili aprelin birində sona çatırdı) məktəbə gedən hər kəs nazik yaz paltarı geyinərdi. Amma, indi... may ayı gəlir, insanlar hələ də evdə peç yandırırlar, evdən çıxanda isə kurtka geyinirlər. Səbəb-havaların soyuq keçməsidir. Yaxud, 2010-cu ilin noyabr ayı sanki, bahar fəsli idi. Amma, 2011-ci ilin noyabrında əməlli-başlı qış fəsli gəlmişdi, deyirdin fevral ayıdır. Başqa bir misal: bilmirəm inanacaqsız ya yox (yoxsa, mənmi məlumatsızammı, başqa bir yerdə olubmu-olmayıbmı-bu barədə bir söz deyə bilmərəm), amma, kəndimdə doğrudan da belə bir hadisə baş veribdir və mənim xatirimdə olanı iki dəfə təkrarlanıbdır. Təsəvvür edin, iyul ayıdır və yağış yağır, bununla eyni zamanda isə əməlli-başlı gün də çıxıbdır! 2011 və 2012-ci ilin yayında belə hadisələr təkrarlanıbdır. Hər ikisi də təxminən 3-5 dəqiqə vaxt müddətində baş veribdir (bu, “çobanaldatması” deyilən yağış növü də deyildir, çünki, “çobanaldatması”nda yağış yağmır, sadəcə bir-iki damcıyla kifayətlənir, hava isə bir qədər buludlu olur, haqqında danışdığımda isə yağış az qala leysan kimi yağırdı, günəşsə öz yerində). Adamın islanmağıyla qurumağı bir olurdu. Halbuki, əvvəllər belə əndrabadi hadisələr ümumiyyətlə olmurdu.
Alimlərin deməsinə görə bundan sonra düz-əməlli hava şəraiti olmayacaqdır. Səbəb isə qlobal istiləşmədir. Doğrusu, qlobal istiləşmənin nə olduğunu bilmirəm, ancaq, fakt budur ki, təbiət də dəyişməyə doğru gedir.
 Göründüyü kimi çox şey qarmaqarşıqlığa gedib çıxır, yaxşılıq vəd edən nəyəsə rast gəlmək müşkül işdir. Deməli, hələ neçə-neçə müxtəlif tipli qurbanlar verməliyik (insan, heyvan, ərzaq, təbiət və s. kimi qurbanlar). Keçid mərhələsi hələ bir müddət də davam edəcəkdir. Yəni bundan sonra baş verəcəklər qaydalardan kənar olacaqdır. Indiki dillə desək, anormallıq üstünlük təşkil edəcəkdir.
 Bura qədər yazdığım uzun-uzadı “mühazirə”mdən də göründüyü kimi şəxsən özüm qiyamətin gələcəyinə inanmıram. Çünki, dünya hələ ki tükənməyib və dünyada açılmaz sirlər qalmaqdadır. Yol, bitdiyi yerdə sona çatır. Qabda heç bir şey qalmayanda bom-boş olur. Dünyanınsa nə yolu sona çatmayıb, nə də qabı boşalmayıbdır. Hələ gediləsi yollar, axtarılası qablar vardır.
 Bəli, dünya yenidən qurulmağa doğru gedir və bundan sonra insanlarda qiyamət inancı tədricən itməyə başlayacaqdır...
P.S. Artıq dərəcədə xaiş edirəm, bu yazımdan sonra mövhumatçılığa qapılmayın, burda yazdıqlarım sadəcə olaraq fərziyyələrdir. Buna bir yazarın təxəyüllü də demək olar.