İsgəndər Həmidovun yalanları

 "İsgəndər Rövşənin qorxusundan yalvardı ki, cinayət işi qaldırılmasın"

Keçmiş daxili işlər naziri İsgəndər Həmidovun bir neçə gün öncə keçirilən tədbirlərin birində prezident İlham Əliyevin ünvanına sərt tənqidi fikirlər bildirməsi ona qarşı hücumların başlanmasına səbəb olub. Deputat Qalib Salahzadə (Hacı Qalib) bəyanat yayaraq hüquq-mühafizə orqanlarından İsgəndər Həmidovun cəzalandırılmasını tələb edib. Dünən isə “Hürriyyət” qəzetində İsgəndər Həmidovun əleyhinə geniş məqalə dərc olunub.

“İsgəndər Həmidovu kim danışdırır?” adlı məqalədə İlham Əliyevin göstərişi ilə başlanan antikorrupsiya tədbirlərini istəməyən oliqarxların olduğu bildirilir. Qeyd olunur ki, həmin oliqarxlar vurulmaq növbəsinin onlara çatacağını bilirlər və ona görə də prosesə hər cür mane olmağa çalışırlar. Bu sırada konkret olaraq fövqəladə hallar naziri Kəmaləddin Heydərovun adı çəkilir. İsgəndər Həmidovun da qəfil gündəmə gəlib məlum kəskin çıxışı etməsinin də arxasında “fövqəlnazir”in dayandığı iddia olunur.
Məsələ ilə bağlı dünən İsgəndər Həmidovla əlaqə saxladıq. Sabiq nazir bildirdi ki, bəzi şəxslər özünün və qohumlarının problemlərinin həll edilməsi üçün yaranmış vəziyyətdən istifadə etməyə çalışırlar: “Mənim fikirlərim bəzilərinə İlham Əliyevə yarınmaq üçün fürsət verib. Guya prezidentin müdafiəsinə qalxıblar, əslində isə məqsədləri başqadır”.
“Hürriyyət” qəzetinin onu K.Heydərovla əlaqələndirməsinə isə İ.Həmidov ana söyüşü ilə cavab verdi: “Öz payına Kəmaləddin Heydərovla əlaqəsi olanın da, heç bir faktı olmaya-olmaya yalan məlumat yayanın da anasını... Mən diqtə ilə danışan adamam?! Mənə dünyada bir dənə qüvvə diqtə edə bilər. O da Kəlbəcər-vətənim, dədəmin qəbri olan yer. Qalan bütün dünya tökülə üstümə ki, filan sözü de, ürəyim istəmədiyi sözü ölsəm də demərəm. Kəmaləddin Heydərovu və ya hansısa məmuru mənim cüzi də olsa müdafiə etdiyimi görən və eşidən olub?! Ölkədə korrupsiyanın başında Kəmaləddin Heydərov, Ziya Məmmədov, Fazil Məmmədov dayanır. Onlar birbaşa prezidentə tabedirlər. Yığıb yuxarı verirlər. Mən korrupsiyaya, korrupsionerlərə qarşı mübarizənin iki əlli tərəfdarıyam. Kəmaləddin Heydərovla mənim dostluğumdan danışırlar, mən də burdan deyirəm, Kəmaləddin kişisən gətir 1-2 milyon ver xərcləyək də. Vallah, o cür iddiaları irəli sürənlərə acıyıram. Axı reallıq hissini nə qədər unudasan ki, İsgəndər Həmidovu hansısa məmurun diqtəsi ilə danışmaqda ittiham edəsən”.
Qeyd edək ki, Hacı Qalib Salahzadə ilə sabiq daxili işlər nazirinin arasında yaranan münaqişədə 1992-ci ildə Bakı şəhər prokuroru işləyən Çingiz Qənizadənin adı da keçir. Hacı Qalib 1992-ci ildə İsgəndər Həmidovun göstərişi ilə günahsız olaraq həbs olunduğunu bildirir. İ.Həmidov isə Hacı Qalibi Bakı şəhər prokuroru vəzifəsində çalışan Çingiz Qənizadənin həbs etdirdiyini deyir: “Hacı Qalibi mən yox, Çingiz Qənizadə tutdurub. Mən daxili işlər naziri olaraq kimisə tutdurmaq üçün sanksiya verə bilməzdim. O zaman birbaşa sanksiyaları prokurorluq verirdi. Hacı Qalib unutmasın ki, hələ də üstündə ölüm işi var. İndiki kimi yadımdadır, onlar öz kəndlərində çayxanada kimisə öldürmüşdülər. Daha sonra cinayətin üstünü ört-basdır etmək üçün işi başqasının üstünə atmışdılar. Hacı Qalib buna görə həbs olunmuşdu. Sonra hakimiyyət dəyişildi və Hacı Qalib azadlığa buraxıldı. Çingiz Qənizadə heç vaxt deyə bilməz ki, bu həbsə bilavasitə mən göstəriş vermişəm. Çünki DİN Prokurorluğa göstəriş verə bilməzdi”.
Deputat Çingiz Qənizadə isə dünən “Yeni Müsavat”a açıqlamasında bildirdi ki, Hacı Qalibi onun tutdurması barədə deyilənlər həqiqəti əks etdirmir: “İsgəndər Həmidovun mənimlə bağlı dedikləri həqiqətə uyğun deyil. Bakı şəhər prokuroru daxili işlər nazirinə və ya nazirin müavininə kiminsə həbs üçün göstəriş verib əməliyyat qrupu yarada bilməz. Mən Bakı şəhər prokuroru işləyən zaman - 1992-ci ildə daxili işlər naziri İsgəndər Həmidov mənə zəng edib dedi ki, Bilgəhli Ramiz adlı şəxsi çayxanada qətlə yetiriblər, qətlin təşkilatçısı Hacı Qalibdir və onu həbs edib gətirtmişik Bakı Şəhər Baş Polis İdarəsinə. Mən və istintaqa baxan müavinim Hüseyn Əlixanovla getdik Bakı Şəhər Baş Polis İdarəsinə. Çünki İsgəndərin bu cür şou xarakterli, hay-küylü həbsləri olmuşdu. Bakı kəndlərindən "Malış" ləqəbli Hacı Tofiqi, İsgəndər Cavadov adlı akademiki, Göyçayski soyadlı polis əməkdaşını, “Cayil Tofiq”i əsassız yerə saxlamışdılar. Mən onları buraxdım. Hesab etdim ki, Hacı Qalibin də tutulması bu tipli həbslərdəndir. Şəhər polisinin rəisinin kabinetində indi Hacı Qalibin adlarını çəkdiyi adamlarla birlikdə Hacı Qaliblə söhbət etdik. Polis əməkdaşlarından biri orada Hacı Qalibə qarşı hörmətsiz hərəkətə cəhd elədi, ancaq qarşısı alındı. Həmin polis sonradan polis orqanlarından xaric olundu. İsgəndər Həmidovun dövründə xaric edildi. Amma onun başqa qanunsuz hərəkətləri də var idi. Onu İsgəndər xaric eləməmişdi. Hacı Qalib deyir ki, məhkəmənin qərarı olmadan, istintaq aparılmadan qanunsuz saxlanılıb. Bu da həqiqətə uyğun deyil. Kifayət qədər qanuna söykənən, prosessual qaydalar səviyyəsində istintaq getdi. Hacı Qalibin həmin ölüm işində təşkilatçılığı sübut edilmədi. Hacı Qalib düz deyir. Mən Bayıl həbsxanasına gedib onu dindirmişəm, hətta ona bir qutu siqaret aparmışam. Belə qənaətə gəlmişəm ki, həmin qətldə Hacı Qaliblik nəsə yoxdur. İsgəndər Həmidov bir şeyi də düz demir ki, Hacı Qalib hakimiyyət dəyişikliyindən sonra buraxılıb. Hacı Qalib azad olunanda hakimiyyət dəyişikliyi olmamışdı. İstintaq mənə məruzə etdi ki, onun cinayətdə əlinin olması sübuta yetmir. Belə olan halda mən onun azad olunması ilə bağlı göstəriş verdim və azad olundu".
Ç.Qənizadə qeyd etdi ki, Hacı Qalibi həbs etdirmiş olsaydı, bu gün çəkinmədən bunu bəyan edərdi: “Hacı Qalibi İsgəndər Həmidovun göstərişi ilə 50-yə yaxın əməliyyatçı evində həbs etmişdi. İsgəndər Həmidov deyir ki, Hacı yalan danışmamalıdır. Amma İsgəndərin özünün bütün həyatı yalan üstündə qurulub. Onu ən yaxından tanıyan insanlardan biriyəm. Mən onun o vaxtlar çox qanunsuz hərəkətlərinin qarşısını almağa cəhd eləmişəm və almışam. Baş prokuroru əvəz edən Mətləb Mütəllimovun Sumqayıtdan maşının baqajına salınıb gətirilməsi göstərişini vermişdi. Bir dəstə göndərmişdi. dövlət katibi, mənim dostum Pənah Hüseynovun belə təkidli tələblərinə əhəmiyyət verməmişdi. Gecə saat 2-də biabırçılığın qarşısını mən aldım. İsgəndər Həmidov daxili işlər naziri olsa da milisoner səviyyəsindən yuxarı qalxa bilmədi. Mənim Bakı şəhər prokuroru olmağıma İsgəndər mane olmaq istəyirdi. Əbülfəz Elçibəy məni evinə dəvət elədi və dedi ki, İsgəndər Həmidov nazir olan günün səhəri Mahir Cavadovun Bakı şəhər prokuroru təyin olunmasını tələb edir, onun qarşısına sən çıxa bilərsən. Mən bundan sonra həmin vəzifəyə təyin olundum. İndi İsgəndər elə bilir ki, Misirdə baş verənlər burda da baş verəcək və o müxalifətin lideri olacaq. Ancaq unudur ki, sosial bazası olmayan şəxs belə iddiada olmamalıdır. İsgəndər çox qəhrəmanlıqdan danışır. Əgər belə qəhrəman idisə, nazir olanda rəhmətlik Rövşən Cavadov onun kabinetinin qarşısında köməkçisini güllə ilə vurmuşdu və İsgəndərin kabinetini dağıtmışdı. Rövşən Cavadovun İsgəndər Həmidova nə elədiyini görməmişdik, amma gəlib kabinetin nə hala salındığını görmüşdüm. Mən buna görə cinayət işi qaldırmaq istədim. İsgəndər Rövşənin qorxusundan yalvardı ki, cinayət işi qaldırılmasın”.

 “Yeni Müsavat”