BAKIDA TEHRAN-TƏLƏVİV DAVASI

Cühudların Bakı işğalı davam edir
İsraildən İranı qəzəbləndirəcək daha bir səfər
Yəhudi dövlətinin rabitə naziri Bakıya gəlir, İsrail şirkətləri Azərbaycanın informasiya-rabitə sektorunda payını artırmağa hazırlaşı

İsraillə Azərbaycan arasında İranı qəzəbləndirəcək daha bir əməkdaşlıq başlayır. Dünən yayılan xəbərlərə görə, İsrailin rabitə və kommunikasiyalar naziri Moşe Kahlon ilk dəfə Bakıya səfər edəcək. Onun səfərinin mayın 16-da baş tutması gözlənilir. İsrailli naziri bu ölkənin rabitə və informasiya texnologiyaları sahəsində aparıcı mövqe tutan şirkətlərin rəhbərləri müşayiət edəcək.

Moşe Kahlonun Bakıda azərbaycanlı həmkarı Əli Abbasovla görüşləri planlaşdırılıb. İsrailin Bakıdakı səfiri Mihael Levon-Lotem İzRus postalına bildirib ki, Azərbaycanda informasiya-kommunikasiya sektoru ən sürətli inkişaf edən sektorlardan biridir. “Mən maraqlıyam ki, İsrail şirkətləri bu sektora investisiyalar qoysunlar. İsraillilərin Azərbaycanda ilk mobil rabitəni yaratmasına baxmayaraq hazırda biz bu sektorda kifayət qədər iri paya malik deyilik” deyə, səfir bildirib. Levon-Lotem xatırladıb ki, 1994-cü ildə İsrailin GTİB şirkəti tərəfindən Azərbaycanda ilk mobil rabitə operatoru olan "Bakcell" yaradılıb. Diplomat deyib ki, Moşe Kahlonun Bakıya gözlənilən səfəri əhəmiyyətlidir, çünki bu, İsraildən ilk belə səfərdir.
Bəs bu səfər İranda niyə qəzəb və narahatçılıq doğura bilər? Məsələ ondadır ki, İran İsrailin Azərbaycandan ona qarşı elektron kəşfiyyat məqsədilə istifadə etdiyini bildirir. Tehranda hesab edirlər ki, İsrail Azərbaycanın cənub regionlarında qurğular yerləşdirərək İrandakı telefon danışıqlarını dinləyir. Bu baxımdan İsrailin Azərbaycanın rabitə və informasiya texnologiyaları sektoruna maraq göstərməsi istənilən halda Tehran tərəfindən sakit qarşılanmayacaq. Çox güman ki, İsrailin də bu sektora maraq göstərməsi təkcə bizneslə bağlı deyil. Məlumdur ki, İsrail telekommunikasiyalar və elektron izləmə sahəsində dünyada ən qabaqcıl texnologiyalara malikdir. Bir neçə il əvvəl məlum olmuşdu ki, İsrail kəşfiyyatı Beyrutda telekommunikasiya şirkətlərindən birində quraşdırılan avadanlıqlar vasitəsilə bütün ölkə boyu telefon danışıqlarını, o cümlədən yüksək rütbəli dövlət rəsmilərinin danışıqlarını izləyib. Azərbaycan son illər hərbi, təhlükəsizlik və digər sahələrdə İsraillə əlaqələri möhkəmləndirir. Bura telekommunikasiyalar və rabitə texnologiyaları sahəsində əməkdaşlığın genişləndirilməsi də daxil olsa İranda narahatlıq daha da artacaq.



musavat.com