Yardımlı-Cəlilabad yolunun bəxti açılır

İcra başçısının müavini Asif müəllimin bildirdiyinə görə 74 kəndi əhatə edəcək bu yol gələn il istifadəyə veriləcək

Xəbər verdiyimiz kimi 2 il öncə Yardımlı rayonundan Cəlilabad rayonuna birbaşa yolun çəkilişinə başlanmışdı. Məqsəd o idi ki, bu rayonun sakinləri Masallı rayonuna girmədən bir-biri ilə daha sıx əlaqə saxlasınlar. Ən başlıcası isə bu yolun çəkilişi nəticəsində Yardımlının və Cəlilabadın 74 kəndini birləşdirən yol əsaslı təmir olunacaq. Nəticədə Yardımlının bir sıra ucqar kəndlərinin sakinlərinin Biləsuvara, Bakıya və digər rayonlara gedərkən ən azı 50 kilometr məsafəyə qənaət etməli olacaqları bu yolun
2 il öncə təxminin Cəlilabaddan keçən 10 kilometrlik məsafəsi inşa edilsə də, iqtisadi böhran nəticəsində tikinti yarımçıq saxlanılmışdı. Hansı ki, indi həmin təmir olunmuş kiçik məsafə də bərbad vəziyyətdədir .
Cəlilabad Rayon İcra hakimiyyəti başçısının 1-ci müavini Asif müəllimin əməkdaşımıza verdiyi məlumata görə 72 kilometr məsafəni əhatə edəcək həmin yolun inşasına bu il başlanacaq və yolun inşası gələn ilin sonuna kimi başa çatacaq. Bu yolun əsaslı təmir olunması üçün Respublikanın Prezidenti İlham Əliyev cənabları şəxsən göstəriş verib və qısa müddətdə inşa ediləcək bu yol minlərlə insanın nəqliyyat problemini həll edəcək.
Cəlilabad İcra Hakimiyyəti Başçısının bu ilki hesabatında o da bildirilir ki, Cəlilabad şəhərinin içməli suya tələbatını ödəmək üçün xarici və yerli mütəxəssislərin birgə iştirakı ilə xüsusi layihə hazırlanır. Layihəyə görə Viləş çayının mənbəyindən Cəlilabada birbaşa su xətləri çəkiləcək. Bununla da Cəlilabadın içməli suya tələbatı tam ödəniləcək. Layihənin dəyəri haqqında hələlik məlumat verilməyib.

Ülvi Məmmədli             "Cənub xəbərləri"