Əl-ələ üzürük fikir okeanında

Xatirə Sadıqova. Şeirlər

İstedadl şairə Xatirə Sadıqova 1981-ci ildə anadan olub. İqtisadçı vəzifəsində çalışır. 2002-ci ildə “Göyərçin yuxusu” adlı kitabı çapdan çıxıb.

Geriyə say fəlsəfəsi

Onda ömrün sonu idi

hamı ağaclara yazdı adını son dəfə

Son ağaca qıymayıb

havaya yazdım adımı mən

silindi adım baxışlarımı çəkəndə

Bir neçə il geri atdı həyat  bizi

daraldıb səbrimizi

Onda ki anlamağa başlayırdıq 

ümidin də ömür kimi qısaldığını

Saçlarıma təzə qarışırdı rənglərin ağlığı

hərdən ağlamağım da tuturdu

yadıma salanda uşaqlığı

Daha neçə on il geri

artıq unutdum illəri

Yenicə atılmışam həyata

önümdə bir ömürlük gələcək

 “gənclik heç zaman bitməz ki”

İndi azadam...

Divar kağızlarına

istədiyim qədər rəsim çəkirəm – quş rəsmi

hələ bilmirəm sözlərin anlamını

Quş qədər azadam.

Azadlıq saatı

Üfüqlərə qoşulub

ulduzların evini arayan adam

gözlərin qaranlıqdı yenə

əllərin yuxulu

onu bil ki, sən

həyat qədər gözəlsən

ölüm qədər qorxulu

Bu da mən

Dənizlərdən uçub gəldim

traffik qəzalarından

metro keçidlərindən

şəhər adamlarının qələbəliyindən

qaçıb gəldim

və anladım ki, sevmək

qurtuluş qədər genişdir

azadlıq qədər məhdud

İndi də

əl-ələ üzürük fikir okeanında

sağda bahardır

solda qış

unutmuşuq bütün yalnışların acısını

ayrılıqların səbrini

bu günü yaşayırıq yalnız

Çünki qovuşmaq

darıxmaq qədər sonsuz deyil

təklik qədər zamansız...