Saqi, mey ver, yenə bir tazə günah istəyirəm

Seyid Əzim Şirvani

Saqi, mey ver, yenə bir tazə günah istəyirəm,

Qaragöz, nameyi-əmalı siyah istəyirəm.

Nədi xətdən bu hicabın, götür ol bürqəni kim,

Etməyə nameyi-əmalı təbah, istəyirəm.

Bikəsü-dərbədərəm, püştü pənahım yoxdur,

Özümə lütfi-xudavəndi-pənah istəyirəm.

Asitanən itinə istəyirəm həmdəm olam,

Maşa’allah, nə gözəl rütbeyi-cah istəyirəm.

Qərəzim xaki-dəri-yarə gədalıqdı mənim,

Mən gədazadəyə bax, rütbeyi-şah istəyirəm!

Mehrim artar sənə, rüxsarıva gəldikcə xətin,

Daim ol bağda mən mehrü giyah istəyirəm.

Çağırın Qeys ilə Fərhadı yığılsın gəlsin,

Seyyidəm, ərseyi-eşq içrə sipah istəyirəm.