Dünya mənim olsaydı

Rəsul Yunan

YOL

Mən yollarda yerimirəm

Yollar məndə yeriyirlər

Bu ağaclar, bu tikanlar

Kollar məndə yeriyirlər

Beynimdə hər yana baxsan

Teleqraf dirəyi vardır

Quşlar tel üstə susublar

Bəlli olan son bahardır

Yollar yeriyirlər məndə!

Səfər etmək istəyirlər

Məni səndən ayırırlar!

Mənə getmək öyrədirlər...

HƏR NƏ VAR...

Hər nə var dünyada uduzardım

Dünya mənim olsaydı

Uduzardım

Bu ormanları

Bütün ceyranlarıyla

Yaşıllıqlarıyla...

Uduzardım dənizləri

Bütün balıqlarıyla

Gəmiləriylə...

Uduzardım dağları

Bütün zirvələriylə, qartallarıyla

Dünya mənim olsaydı

Sonuncu qarışqası üstə

Gözə görünməyən qumu üstə

Qumar oynayardım...

Nəyə gərəkdir bu dünya

Sən olmayan yerdə!