Doğruluq vədi yalan

İmarət Cəlilqızı

TƏZAD

Bu bir bardaq təmiz  su...

Hansı yöndən baxılsa,

Su  olduğu  seçilən,

Təmiz yerə  süzülsə,

Saf  olduğu  daha  tez,
Daha  aşkar  bilinən,

Zəm-zəm  kimi  içilən-

                                  Onu  sərxoş  eyləyib

                                 Gözlərinə  qan  salan 

əvvəldən  içdikləri...

Bu bir  aydın, hamar  yol,

əvvəli,  sonu  bəlli,

nə  sağ-solu  uçurum,

nə qaranlıq  döngəli…

                         “Gedər-gəlməz!”  söyləyib

                         onu qorxuya  salan

                        (doğruluq  vədi  yalan)

 əvvəllər  keçdikləri…

    Bu, maraqlı  bir  kitab,

    hamı  ilə  eyni  üz,

    eyni  dillə  danışan,

   uşağa da işnişən,

   böyüyə  də yovuşan,

   hər  kəlməsi  birbaşa,

  kimisinə  bir  sətir, 

  kimisinə min varaq,

  anlayana  güc, dayaq--

                            Onu yoldan eyləyib

                           ucalardan  endirən,

                           yanlış  səmtə  döndərən

                          əvvəllər vərəqləyib

                          əvvəldə açdıqları…

                                 … Əlindən  qaçdıqları…

UÇMAQ OLMUR…

Tale, yazı-

hərdən belə

mat qalası

işləri var:

qanad verir,

fəza vermir,

çırpınırsan

dar qəfəsdə-

                 Uçmaq olmur.

Xatirələr-

unudulmur,

dönə-dönə

varaqlanır,

təqib edir

səni hər an,

dünən. bu gün,

son nəfəsdə-

                  Qaçmaq olmur.

Üzüntülər-

bağlı qalmış

könüllərdə

qalaqlanır,

gizli qalır

min illərlə

hər bir kəsdən-

                   Açmaq olmur.

Sərsəm dünya-

hey ara ki,

verdiyi nə,

aldığı nə?

Ayırd etmək

asandırmı?!

sən nə arzu,

nə həvəsdə-

                    Seçmək olmur. 

Maneələr-

qaya kimi

qaba-qaba,

nəhəng-nəhəng,

dəf edirsən

bir həmləyə,

bir kəlməyə…

maneələr

şüşə kimi,

güldən incə,

güldən kövrək

qoyur səni

hey bu üzdə-

                           Keçmək olmur.

Duygular var,

yaşadıqca

əriyirsən

gilə-gilə,

təhlükə var,

üzərinə

yeriyirsən

gülə-gülə,

zəhər var ki,

təşnəsisən,

içirsən

siləbəsilə,

şərbət var ki,

məcbur eylə,

başın kəs də-

                      İçmək olmur!