Sən yazmasan, mən yazmasam, kim yazar?

Elman Eldaroğlu

Keçmişindən, bu günündən qardaşım,
Sən yazmasan, mən yazmasam, kim yazar?
Korşalarsa bir gün elin yaddaşı,
... Od tutacaq, alışacaq hər məzar.

O ellərdə oğul olub mərd olub,
O ellərdə sevinc olub, dərd olub,
Qələminə calaq olub, bənd olub,
Sən yazmasan, mən yazmasam, kim yazar?

Elim, sanma oğulların tükənib,
Papaq altda neçə oğlun təklənib.
El-obanın qeyrətinə söykənib,
Sən yazmasan, mən yazmasam, kim yazar?

Yardımlıdır, səcdə yeri Elmanın,
İlham yeri, vəcdə yeri Elmanın.
Lap olsa da küncdə yeri Elmanın,
Sən yazmasan, mən yazmasam, kim yazar?