Pis keçmədi

Narıngül


Pis keçmədi
sənsizliyin birinci günü.
Üzümdə 
payızın tüstülü nəfəsi.
Ətrafda
qocalmış  və yorğun bir ağaclar.
Yola göz dikənlər, 
uzaqda
sahilə dönməyən gəmilər. 
Bir də mən -
inamsız və yalnız.
Əsən külək belə hiss etmədi məni. 

Pis keçmədi... 
Havasız, qaranlıq bir yerdə
çırpına-çırpına 
can verdim.
Matəm elan etdim
küçəmiz ağladı.
Şəhər 
hara getdi bilmədim.
pis keçmədi...
Çətini birinci addımdır.
görüşsək 
bağışla söyləmə...


Səndən sonra


Səndən sonra
bir ürək calandı  göylərə,
damla-damla 
qopdu göy üzü...


Səndən sonra
başlandı bu yağış.
Ağlamaqdan öldü şəhər.
Yağış uzunluqda yol getdim
yağışa dua etdim.


Səndən sonra
balıq ömrü yaşadım-
azad və çarəsiz.
Suyu canıma çəkdim
dənizlər ağladı.


Səndən sonra
su çəkmiş canımla
adam izdiihamına qarışdım.
Adamlar islanmadı.
Ağzı suyla doldu
çaşqın qadınların.
O qadınların ki,
onları heç zaman  sevməzdım...


Səndən sonra
çox şeylər oldu
anlada bilmirəm...
və
o qədər ağladım ki,
yaz gəldi.


Sənə


Sənə 
Hisslərimi gətirmişəm
Hisslər ötəri şeydir.
Bir qadınlıq hissdir
Bir qadınlıq uduzmaq,
bir qadınlıq həvəsdir
Sənə
Hisslərimi gətirmişəm.
Hisslərimə sığal çək.
Təpədən – dırnağadək
hisslərimə köçmüşəm
məndən heç nə qalmayıb.
Sənə
hisslərimi gətirmişəm
Hisslər çağırışdır.
Qədim insan səsi
və
vəhşi sevgisi...
ürəyimdən qan damır.


Sənə hisslərimi gətirmişəm
hisslər dərk edilmir!
Bütün dərkedilməzlər
daha böyük görünür.
Hisslərimdən böyük deyilsən.
Sənə
hisslərimi gətirmişəm.
Bir az anlayışlı ol.
Bəlkə bu sonuncu şansındır,
ağıllana bilərəm...


Söykəndim yoxluğuna


Sən məni tərk etmisən
Gizli mənzilin kimi.
Səndən bu yan dinclikdir
Dinclikdir ölüm kimi.


Keçmisən o tərəfə
Ortaya  sərhəd düşüb.
Aradan bir xətt keçir
Bu taya həsrət düşüb.


Uduzacaq bu dünya
Mənim kimi tək ilə.
Hara çəkim canımı
Bu boyda istək ilə?!


Çəkilmişəm  özümə
Qaranlıqda axşam tək.
Qurumuş göz yaşlarım
Qvcuma töküləcək..


Çatmısan son deyilmiş
Yol gedir sonluğuna.
Səni tapa bilmədim
Söykəndim yoxluğuna.