Qadınım üçün sentimental şeir

Əli Şirin Şükürlü

payız öncəsi
oğlumun toyunda
profildən çəkdirdim şəklimi
üzüm tam görünməsin deyə

profildən çəkilən bu cür fotolar
“tədricən yoxaçıxmanın” şəklidi əslində

gələn payız...yox
gələn payızdan sonra qışda
doğum günümdə gələrsən – yaxşı?
gələrsən ilk görüşə gəldiyin tək –
üzündə təbəssüm


gələrsən – yaxşı? mütləq gələrsən
işdi mən olmasam da
şəklim mütləq gülümsəyəcək üzünə
ilk görüş yadına düşər –
heykəl kimi dayanmışdım
sənsə üzundə-gözündə sevinc
lap sevgiyə bənzəyirdin. heç söyləmədim:
o vaxt mən sevgiyə tutulmuşdum
indi sənə əzab mənə ağrı verən
xəstəliyə tutularkən xatırladım bunu bir də

gələn payız...
gələn payızdan sonra qışda
doğum günümdə gələrsən – yaxşı?
mütləq gələrsən vədimə xilaf çıxmaram
gözləyəcəm ən azı heykəl şəklində -
üzündə qərib təbəssüm