Məmməd Qədir - Böyüməz

Ucalar ana alqışı,

Anadan qarğış böyüməz.

Qatılmasa göz yaşları

Sel kəsər, yağış böyüməz.

Yük yoxdursa köçümüzdə,

Dünya bizim ölçümüzdə.

Bahar gülsə içimizdə,

Çölümüzdə qış böyüməz.

Heç güvənmə yad daşına

Yaddaş dönər baş daşına

Ağac əkərlər başına

Amma bir qarış böyüməz.

Kimə lazım papaq, örtük?

Qeyrət yoxsa artıq bir yük.

Vuruşmasa türk oğlu türk

Cahanda barış böyüməz.