Ayətullah Xamenei: Amerika İran xalqının sözün əsil mənasında əsas və pis düşmənidir

"Amerika qarşısında güzəştə getmək onları daha da həyasızlaşdırır"

Ali Rəhbər Ayətullah Seyid Əli Xamenei 13 Aban – Dünya İmperializminə Qarşı Milli Mübarizə və Şagird Günü ərəfəsində minlərlə tələbə və şagirdlə görüşüb. Maide.Az leader.ir saytına istinadən xəbər verir ki, görüşdə çıxış edən Ayətullah Xamenei  gənc nəsli cəmiyyətin qabaqcılı və proseslərə təsiredici gücə malik adlandırıb. O deyib ki, gənc nəsil istedadlı və uğurlu nəsildir, heç şübhəsiz əziz İranı bütün maneələrdən və çətinliklərdən qurtararaq əlverişli zirvəyə qədər çatdıracaq: “Əlbəttə bu parlaq məqsədə çatmaq üçün İran xalqının əsas və xəbis düşməni, yəni Amerikanı tanımaq, elm öyrənmək və çalışmaq, eləcədə Allahla əlaqəni gücləndirmək  lazımdır”.
Ayətullah Xamenei dünya hegemonlarının İran xalqına qarşı düşmənçiliyinin indiyədək heç bir təsirinin olmadığını bildirib və deyib ki, Amerika sözün əsil mənasında əsas və pis düşməndir: "Bu həqiqət, təəssübkeşlik və bədbin baxışdan deyil, təcrübədən, hadisələrin düzgün öyrənilməsindən və meydandakı reallıqların müşahidəsindən əldə olunan nəticədir".
Ayətullah Xamenei ABŞ prezidentinin İran xalqını terrorçu adlandırmasını ağılsız davranış adlandırıb: “Bu ağılsız söz göstərir ki, amerikalılar sadəcə İran rəhbərliyi və dövləti ilə deyil, yorulmadan onların qarşısında müqavimət göstərən İran xalqının mövcudluğuna qarşı düşmənçilik edir və kin saxlayır”. Ayətullah Xamenei bir neçə il öncə bir Amerika rəsmisinin "İran xalqının kökünü kəsməliyik" deməsini xatırladaraq qeyd edib ki, onlar belə bir zəngin tarixi və mədəni keçmişə malik olan bir xalqın kökünü kəsməyin mümkün olmaması reallığını dərk etməkdə acizdir. 
Ali Rəhbər Amerikanın davamlı səhvlərə yol verməsinin səbəblərini açıqlayıb: “Amerikalılar əvvəlki nəticəsiz məkirli planlarını davam etdirirlər, ona görə ki, düşmənçilik və kinləri onları həqiqəti dərk etmək və düzgün qiymətləndirmə qabiliyyətindən məhrum edib.”
Ayətullah Xamenei bildirib ki, Amerika qarşısında güzəştə getmək onları daha da həyasızlaşdırır, bu səbəbdən yeganə çıxış yolu mübarizə və müqavimətdir.