Votme- Votje (talışca qəzəl)

Mirfayaz Likmekani

Votme: - Mıni bə Məjnuni to məkə,
Votje: - Mıni şəytoni aspo məkə!

Votme: - Vəse tı dışmenon şo məkə,
Votje: - Orxın, Rəddbi mıni roo məkə!

Votme: -Dardi şəv-ruj bəmı bo məkə,
Votje: - Bıpı mını tı rıkno məkə!

Votme: - Pebəqiyem bəvitem, jo məkə,
Votje: - Hiç handə xıyol jəqo məkə!

Votme: - Mıni çı dınyo bezo məkə,
Votje: - Mıni bebəfon həmro məkə!


Votme: - Bıdə dastom dasti co məkə,
Votje: - Əbıni ğət jəqo ko məkə!

Votme: - Jiye bomıno ozzo məkə,
Votje: - Çımı xuni tı sio məkə!

Votme: - Bəməsej mardəm. Xəto məkə,
Votje: - Pı - mo bəbole kəyxo məkə!

Votme: - Daynə bome, bı koy so məkə,
Votje: - Ne, ne, ıştəni rısvo məkə!

Votme: - Mardedəm sədo pevlo məkə,
Votje: - Çiç? Çımı umri bə yo məkə!

Votme: - Bəvədə zulmi dumo məkə,
Votje: - Mirfəyaz  ıştınim ğo məkə!