Ramin Cahangirzadə, şeirlər

       ALIŞIR SULARIN DALĞASI

   Şırıldayır adın

   Əsən yellərə

   Lal baxışından qasırğalar qopur

   Alışır suların dalğası

   Lillənirsən

   Əllərindən sətirlər axır.

   Cəsarətini qorusan

   Əzilməyəcək bəyazlığın

   Varaqlandıqca gözəlləşəcəksən

   Alacağını olacağından alacaqsan

   Narlan misralarında

   Şırıldat kəlmələrini,

   İztirablı kağızlara.

   Romantik olacaqsan, inan!

          MƏN TAM FƏRQLİYƏM

Mən tam fərqliyəm

Heç kim mənim kimi deyil

Mənm fərqli olduğumu

Bayquş bilir

Çünki mən

hər yerə desən getmişəm

Lap aya da çıxmışam

Ulduzları dərmişəm

Dərib yerə sərmişəm

Əzrayılla çiling-palanc oynamışam

Mələklərə sataşmışam

Tanrıyla tanrıma görə əlbəyaxa

olmuşam

Lap doğum günüm də fərqli idi

Anam məni yerdə yox

Göydə doğdu

Buna ulduzlar şahiddir

Mən tam fərqli olduğumu

Sizə sübut edəcəm

Amma öz aramızdır

Adamların fərqli olmağı

Fərqsiz olmaqlarındadır