Bu gecə

Sayman Aruz

                   (Tanış özgəyə ithaf)

Bu gecə kimsə mənim könlümə bir sevgi salıb

Kimsənin istiliyi məndəki yollarda qalıb

Kimsənin  izlərini hiss edirəm qəlbimdə

Susuram, ağlayıram, yol gedirəm qəlbimdə!

Oturub pəncərədə “huuu” eliyib yol çizirəm

Ayrılıq fəlsəfəsin öz xəyalımda çözürəm

Oturub pəncərədə göz tikirəm mən buluda

Gözlərimdən bir ovuc göz tikirəm mən buluda.

Məndə bir dar ağacı “gəl məni sındır” çağırır

Məndə bir tənha kişi “gəl məni dindir” çağırır

Anbarın dibindəki, tənha o qolçaq kimiyəm

Tollayıb kimsə məni, baxmayaraq mən diriyəm!

Bu gecə kimsə məni addımı altında əzib,

Kimsə bol-bol içimi barmağı üstündə gəzib.

Mənə rast gəlmək olar hər küçədə, hər tində

Özlədikcə sınıram pəncərənin bətnində.

Mənə yas tutmaq üçün saçlarını yoldu payız

Bu gecə ağlayıram, ona görə oldu payız!

Mut filimlər kimidir, Tom və Ceri oynayırıq

Və uşaqlar kimi öz seyrimizə doymayırıq!

Sevgi kartoon kimidir televiziyon beynində

Sevgi ölmək kimidir sevişməyin heynində

Sevgi yapraq kimidir, hey göyərir-hey tökülür

Sevgi insan kimidir, gah dikəlir, gah bükülür!