Göy üzü o qədər məsum ki…

Əli Şirin Şükürlü

çevrilmə

otururam
yanım ağrıyır,
gəzirəm ayaqlarım;
baş baş olmaqdan bezib,
ayaqlar  ayaq olmaqdan.
bəlkə dəyişən məni, allah,
çevirəsən başı üstə -
ayaqlarım baş olsun,
başımsa ayaq.
görənlər baxıb gülsünlər:
bu ikibaşlı topala bax!

göy üzü o qədər məsum ki…

   səmada ulduzlar
   dənizdə ləpələr qaçar
   qaçar qaçar
   açar açar … sirrin açar?

   göy üzü o qədər məsum ki…
   torpaq çadır-çadır
   torpaq cadar-cadar
   çatar çatar 
   qürbətdən iniltilər çatar:
nəyimə gərəkdi vətən -
goruma gərəkdi vətən
bir parça torpaq şəklində?

göy üzü o qədər məsum ki…
içər içər
araq şampan viski içər
içər içər
müsəlmanın qanın içər
içər içər
pepsi kola içər
içər içər…

sökər tikər tikər sökər
sökər sökər tikər tikər
əkər biçər biçər əkər
biçər biçər biçər
zavallı

göy üzü o qədər məsum ki…
satar satar
nefti qazı suyu ləli satar
satar
qatar-qatar qatar-qatar

qatar qatar
dəmiri qızıla
suyu neftə
havanı qaza
qatar qatar

“çay daşını ləl daşına qatar” qatar
zəmanə zalım oğlu

göy üzü o qədər məsum ki…
səmada ulduzlar
dənizdə ləpələr qaçar
qaçar qaçar

aşar aşar
daşar daşar
torpağın qəzəbi dənizin çirki
göy üzü o qədər məsum ki…

pərdə

kənardan
ikiüzlü görünür pəncərə;
yarısını örtüb pərdə.
pərdə nə pərdə. pərdə – əl-əlvan.
amma
yarısı – canlı mənzərə:
çiçək görünür,
ağac görünür,
yol görünür,
göy görünür,
adam görünür…
yəni
həyat görünür həyat
pəncərənin yarısından.

pəncərənin yarısını örtüb
pərdə. pərdə nə pərdə.
pərdə – əl-əlvan.
əl-əlvan pərdə arxasında                    
düz yarısı pəncərənin -
darıxırmı görəsən?!.
P.S. mən heç…
mən darıxıram həmişə.
ruhun köməyim olsun, anam,
darıxan adamam mən darıxan adam.

***

Bu gün
ölüm hökmü verilmiş
məhbus kimiyəm,

qorxub diksinirəm
hər addım səsindən,
hər kəlmə sözdən.

Ölüm hökmü verilmiş
məhbus kimi
ürəyim təşvişdə,
qulağım səsdə,

sevgi arayıram
hər deyilən sözdə,
hər baxan gözdə.

Ölüm hökmü verilmiş
məhbus kimi
cəllad kötükləri, dar ağacları,
dümqara ölüm – son ümidim.

Bu gün
ölüm hökmü verilmiş
məhbus kimiyəm,
bu gündən hifz elə məni,
Ya Rəbb.

***                             

yağışın altında
bir sən idin bir də mən

saçların islanıb
dəyir üzümə
əllərin əllərimə
gözün gözümə
yarpaqlar uçuşur
düşür izimə

yağışın altında
bir sən idin bir də mən

sevincimiz sahil boyu –
islanmışdı yağışda
kimsə xəbər tutmaz bizdən
qorxma gülüm
gizlənmişik biz yağışın altında

yağışın altında
bir sən idin bir də mən

yağış yağır
şəhər qaçıb yağışdan
şəhər qaçıb
dayanmışıq islanmışıq donmuşuq
asılmışıq bir sevdalı baxışdan

yağışın altında
bir sən idin bir də mən

yağış yağır
dünya qaçır yağışdan
dünya qaçır zaman axır
bir dünyasız
bir zamansız dünyada
biz qalırıq sevgilərin adından
o yağışın altında

yağışın altında
bir sən idin bir də mən

***

Bir payız günü
hava çiskinli
və mən kədərli.

Yenə də
başımı qatar adamlar,
yenə də
dadıma çatar ağaclar
bu payız günü.

Adam yaşadıqca
misqal – misqal ürək itirər,
ağac yaşadıqca
yarpaq – yarpaq ürək gətirər.

Baxıb ağaclara
mən yolumu azaram,
doğulandan qəlbimə
məzaram mən, məzaram.


ali_shirin@mail.ru