Meqapolis obrazları

Dilqəm Əhməd

Qapılar açılınca,

divarlar çıxır qarşıma

Meqapolis yalnızlığı içində

Pəncərədən dərvişlər boylanır.

Daha hücrələr yalnızlığı bölüşə bilmir

Şəhər minlərlə yalnızlarla doludur

Saxta üzlər gülümsəyir bir-birinə

Sevgilər imitasiya olunur

Dostluqlar teatr səhnəsindən boylanır

Gecələr pərdə qapandığında

24 saatlıq maskalar enir

Obrazlar dağılır

***

Hər səhər paltarlar ilə birgə

Obrazlar ütülənir

Obrazlar seçilir

Bu gün vəfalı sevgili obrazındayam

İstədiyin qədər səni sevdiyimi deyəcəm

Əllərini tutacam, ürəyimin titrədiyini söyləyəcəm

Sənin gözlərin parıldayacaq, mənsə parıltılı baxmağa çalışacam

Gülümsəməni sevdiyimi söyləyəcəm

Bu günün unudulmaz olduğunu söyləyəcəm

Sən aldanmağı sevəcəksən, mən yalanlara öyrəşəcəm

Axşam olacaq yenə, obrazlar asılqanına taxacam

Özümə dönəcəyəm

***

Bu gün sədaqətli dostam

Pulsuz mesajlarımdan göndərəcəm

Darıxdığımı söyləyəcəm

Yaşanılan xatirələrdən danışacağıq

Bir çaynik limonlu çayla

Ən uzun çay qədər xatirə danışacağıq

Metroya birgə minəcəyik,

ayrı stansiyalarda düşəcəyik

Hər kəs öz maskasının gərəyini ödəyəcək

***

Bəzən insan olmağı xoşlayırıq

Kənardan baxılanda hətta insana oxşayırıq

Vicdanlı oluruq,

bahalı kafelərdə insan haqlarından danışırıq

Savaşlara lənət oxuyub, savaşla yaşayırıq.

***
Boğuluram obrazlar içində

Meqapolis yalnızlığında

Qapılar açılınca,

divarlar çıxır qarşıma

22.10.2011

İnsan olacağam bu gün…

Bu gecə çox pessimistəm,  toxunma mənə

Götür saçlarının qırıntısını üzərimdən

Sakitcə yuxulamaq istəyirəm

Uzunmüddətli özünəqapanmaya ehtiyacım var

Yorğunam, düşüncələrim korşalıb,

Ən sevdiyim baxışlarını izləməyə də

Taqətim yoxdur.

Bu gün baxışların yorur məni

Sevgi deyil, süstlük duyuram gözlərindən

Kipriklərin yerin asılqanı kimidir

Azacıq toxunsam qırılacaq kimidir

Baxma daha üzümə, gözləmə

Bu gün söyləməyəcəm səni sevdiyimi

Bu gün ancaq özümə qapanacam

Bu gün sevgimi yarı böləcəyəm

Bu gün insan kimi olacam, Tanrı olmayacağam

Ədaləti sonunadək müdafiə edəcəm

Yorğun olmaq hüququmdan istifadə edəcəm

Susmaq azadlığımdan istifadə edəcəm

Bəsdir, yığışdır saç qırıntılarını

Bu gün səni sevməyəcəyəm

15.10.2011

Aysel üçün

Zamana ötürdüm

Zamanla yolçu olduğumu

anlamadım

Unutduğumu sandım

Unudulanların mövcud olduğunu

anlamadım

Yadlıq  içində çırpınıram.

Kənarda dayanan hər şeyi itələyib

Arxası olmayan divarlara qapanıram.

Künclərin vahiməsi çökür  üstümə.

Üzü  xəstəlikdən yara tökmüş uşaqlar girir yuxuma.

Gözəlliklərin aldadıcı olduğunu anlayıram.

Həyat- bu  ki anlamsızdır

İnsanlar- hamısı çarəsizdir

Toxunduğum  hər  bir şey ümidsizdir.

Yoxluqla ovunacağımı sandım

Yoxluğun olmadığını anlamadım.

Sən yox olmamışdın

Nə də zamanda buraxılmışdın.

Qaranlıq düşəndə bütün parıltılar yox olduğunda

Gerçəkliklər parıldayır qarşımda

Sən  gerçəksən,

İçimdə yaşatdığım yeganə gerçək.

18.09.2011

Divarlar arxasında

Yaşamı pəncərədən izləyirəm

Qarşıya düşən ləkələr çox olur

Yağışın yağmasını gözləyirəm

Ömür ləkələrlə birgə yox olur

Budur, bir ləkə yenə düşdü

Bir baxışını itirdim.

Hər düşən ləkə bir baxışını aparır

Çarəsizcə izləyirəm

Əlim çatmır pəncərənin qarşısına

Budur, sən yarpaqlar arasında gülümsəyirsən.

Sevinc dolu bir gün

Uzadıram əllərimi

Əllər ləkəli

Pəncərə ləkəli

Göy üzü bulanıq

Yer üzü vulkana hamilə

Atlantın ürəkbulantısıdır yer üzü

Bütün sevgilər ləkələrə bürünür.

Üzüm pəncərə şüşələri arasında

Yox olan baxışlarının arxasınca sürünür.

Artıq baxdığım pəncərə deyil

Ləkələrlə dolu bir divar

Sən artıq divarlar arxasındasan…

06.10.2011

Yanusa öygü

Yaşamaq çətindir

Azadlığa təşnə olan

ömürlük məhbus kimi

başını aşağı salan

hər dəfəsində məyus kimi

yaşamı lənətləyərək

bütün ömrü ələyərək

sənsiz bir şey qalmadığını görmək…

Zamanı qamçılayaraq

Kentavr üstündə yenilən sərkərdənin

Yerlə sürüklənən bədəninin acısını hiss edərkən

Yanus allahı bütün çirkinliyi ilə qarşında durarkən

Ona öygü söylərkən

Anlayırsan yaşamın çoxüzlü olduğunu

Ulu Yanus,

Bu dünyanın

Bu anlamsız yaşamın, çirkin insanların

Yaradıcısı bir tək sən ola bilərsən.

Sevgiləri iki üzlü edən

Xəyanəti yaradan

Ən gözəl hissləri yox edən

Yalnız sən ola bilərsən…

Sən çirkinliyin tanrısısan

Yəni bizim yaşamımızın

Hara baxırsan, intihar

12 yaşa doğru uşaqlaşır intihar

Hər kəs sonucda intihar edəcəksə…

İntihar kəndiri boğazına keçirmək deyil

Bu həyatı yetmiş il arxanca sürükləməkdir

Yəni yaşamağın özü intihardır

Sonunda anlayırsan, Yanusu.

Hər kəs doğulduğunda intihar edirmiş.

02.09.2011