SƏNƏ SEVMƏDİYİM GÜL GƏTİRMİŞƏM...QƏRƏNFİL

Elşad Can Şamil

Sənə sevmədiyim gül gətirmişəm...
qərənfil...
Sənə sevmədiyim diqqət gətirmişəm
qərəzli.
Sənə sevmədiyim xatirə gətirmişəm.
silməklə pozulmayan.
Sənə sevmədiyim röya gətirmişəm.
heç сürə yozulmayan.
Sənə sevmədiyim can gətirmişəm.
bədənlə ruh arasında haçalanan.
Sənə sevmədiyim “biz” gətirmişəm,
iki dünyaya parçalanan.
Sənə sevmədiyim il gətirmişəm.
yenilənməyən...
Sənə sevmədiyim xəyal gətirmişəm
reallanmayan

Sənə sevmədiyim fəsil gətirmişəm.
matəm havası.
Sənə sevmədiyim qida gətirmişəm
ehsan halvası
Sənə sevmədiyim gün gətirmişəm.
cümə axşamı.
Sənə sevmədiyim sükut gətirmişəm
dincəl yaxşımı?!
Sənə sevmədiyim söz gətirmişəm
“səni tək qoymayacağam”
Sənə sevmədiyim vəd gətirmişəm
“sən olmazsan olmayacağam”
Sənə sevmədiyim şeir gətirmişəm
ağı...
Sənə sevmədiyim qismət gətirmişəm
axı........................!?
Sənə sevmədiyim “nişan” gətirmişəm...
şəhadətimdə.
Sənə sevmədiyim hüzün gətirmişəm
səadətimdə.
Sənə sevmədiyim sevgi gətirmişəm.
yoxluğunda yaranmış.
Sənə sevmədiyim vüsal gətirmişəm
hicrana calanmış.
Sənə sevmədiyim dua gətirmişəm...
“allah rəhmət eləsin”...
Sənə sevmədiyim “məkan” gətirmişəm...
“yerin cənnət eləsin”
Sənə sevmədiyim görüş gətirmişəm
ziyarət.
Sənə sevmədiyim gül gətirmişəm...
qərənfil...