Tərbiyəsiz uşaq kimidir yaşam!

Məlihə Əzizpur

Tərbiyəsiz uşaq kimidir yaşam!
"Nə dil qanır, nə də Tanrı."
Şımarıq - saymaz.
Birisinin ağzını əyir
Birisinə söyüş verir
Birisinə boğma basır
Birisini yıxıb qaçır
Birisinə tikə tutub,
Birisindən acıq açır.
Yaşam,
Tərbiyəsiz uşaq kimidir
Təmkinsiz - şıltaq.
 -Zəhləsini qaçırdır adamın-

Bu, dədəsi-nənəsi
Bəlli olmayan sırtıq . . .
***
Orada bir ağac!
Bir kəndir bağlanmış boynuna
Ölüm biçimində.
İstədiyin kimi asa bilərsən məni,
... Dadını çıxara bilərsən yani.
Burada bir mən!
Bir, çatı salınmış boynuma
Yaşam biçimində.
İstədiyim kimi asılmaya bilərəm səndən
Və, dadını çıxara bilərəm özgürlüyün . . .
Orada bir ağac
Burada bir mən
Arada bir sən . . .
* * *
Bir kəndir sallanır
Yaşamla ölüm arasında . . .