Əli Əmirov - Nə ola-ola!

Əlvida söyləmə, görüşəcəyik,

Demə, ayrılığa öyrəşəcəyik.

Yalnız xəyaldamı öpüşəcəyik?

Durma, qollarını boynuma dola!

Sonrası? Nə bilim, nə ola-ola!

Nə qədər doğmasan, nə qədər yaxın!

Yaxın gəl bir az da, yaxından baxım!

Gəl, sənə toxunum, şimşək tək çaxım,

Dağılsın buludlar qoy, sağa-sola!

Sonrası? Nə bilim, nə ola-ola!

Bacarıb, özünü alsan da ələ,

Titrəyir vücudun, gəlir zəlzələ!

Tamam alışmayıb tüstüdür hələ,

Söndürmə ocağı, yenidən qala!

Sonrası? Nə bilim, nə ola-ola!

Yalvarıb desən də get, sevmə məni,

Gözlər inkar edir dilin deyəni.

Yaşayaq iküzlü bir faciəni?

Qorxursan bu bizi bəlaya sala?

Sonrası? Nə bilim, nə ola-ola!

Alışan tonqalam mən ömrüm boyu,

Soyumaq mümkünsə, sən özün soyu!

Bir nakam sevgiyə qazırsan quyu,

Dəfn etsən, hönkürüb, ürəkdən ağla!

Sonrası? Nə bilim, nə ola-ola!

Bir arzu qəlbimin dərinliyində,

Deyir ki, mənim ol günün birində!

Dönsəm xatirəyə gündəliyində,

Şirin nağıl kimi oxu maraqla!

Sonrası? Nə bilim, nə ola-ola!

Sən mənim könlümə bir hədiyyəsən,

Sordum: "mənimkisən?"- tez "hə" deyəsən!

"Hə, yalnız röyada",- güldün deyə sən.

Mümkünmü Ələmi day oyaq qala?!

Sonrası? Nə bilim, nə ola-ola!