"Vəli Ələsgərov dedi ki, zəng vur, Allah gəlsin, görək, kişidir, ya arvad"

Naxçıvan şəhər sakini, Təbriz küçəsi ev 1, mənzil 55-də yaşayan Ağasiyev Nizami Rəsul oğlunun Naxçıvan MR-in keçmiş milli təhlükəsizlik naziri Vəli Ələsgərov tərəfindən işgəncəyə məruz qaldığı haqda məlumat vermişdik. “Hürriyyət”in ötən saylarında qeyd etmişdik ki, V.Ələsgərovun nazirliyi dönəmində Naxçıvan MTN-in əməkdaşları tərəfindən həbs olunan N.Ağasıyev İŞİD-ə məlumat ötürməkdə ittiham edilərək, idarədə ağır işgəncələrə məruz qalıb. Son günlər isə məlum olur ki, əslində, Nizami Ağasiyev MTN-ə tamamilə başqa səbəblərdən aparılıb və “İŞİD-lə əməkdaşlıq”da ittiham olunması naməlum bir qadının müraciəti əsasında quraşdırılıb. Bu haqda dünən redaksiyamızın qonağı olan N.Ağasiyevlə söhbətimizdə məlumat əldə etdik.

Oxucuların diqqətinə çatdıraq ki, Nizami Ağasiyev 1981-ci il sentyabr ayının 11-də Naxçıvan şəhərində anadan olub. 1999-cu il oktyabr ayının 1-də Naxçıvan şəhər Hərbi Komissarlığı tərəfindən həqiqi hərbi xidmətə çağırılıb, Naxçıvan MR Culfa rayonunda yerləşən N saylı hərbi hissədə xidmət edib. Hərbi qulluq zamanı könüllü olaraq Bakı şəhərində zabit heyətini təkmilləşdirmə kursunda təhsil alıb. 2001-ci ilin yanvar ayından gizir rütbəsi ilə hərbi xidmətini davam etdirib.

Bundan sonra könüllü olaraq ön cəbhəni seçərək, Ağdam rayonunun N saylı hərbi hissəsində kəşfiyyat qrup komandiri kimi xidmətə başlayıb. Son olaraq Naxçıvan MR Şahbuz rayonunun N saylı hərbi hissəsəsində minaatan batareyasının baş çavuşu kimi xidmət göstərib.

N.Ağasiyev deyir ki, 2015-ci il avqust ayının 10-dan sonra onun mobil telefonuna “Watsap” vasitəsilə çılpaq qadın və kişi şəkilləri, nalayiq mesajlar gəlib. Dediyinə görə, hər şey də bundan sonra başlayıb: “Mən bir-iki dəfə xəbərdarlıq etsəm və nörmrələrini “qara siyahı”ya salsam da, həmin mesajlar gəlməkdə davam edirdi. Yəni hər dəfə eyni adam ayrı-ayrı nömrələrdən mesajlar yazır, şəkillər göndərirdi. Bu səbəbdən avqustun 27-də Naxçıvan MR DİN-in insan alveri şöbəsinə rəsmən müraciət etdim. İdarədə bildirdim ki, mən ailəli olduğum üçün bunların əlindən evdə telefonumu açıq qoya bilmirəm. Digər tərəfdən, onu da vurğuladım ki, gecə həyacan siqnalı verilsə, mən hərbi hissəyə vaxtında çata bilməyəcəm.

Onlara mesajları və şəkilləri də göstərib dedim ki, məni bu nömrədən narahat edirlər. Bildirdilər ki, bir də belə şey təkrar olunarsa, bizə xəbər ver, tədbir görəcəyik. Dedilər, biz danışıb başa salarıq, bir də sən narahat olmazsan. 

DİN-dən çıxandan 2 saat sonra həmin nömrədən mənə qadın zəng etdi. O, gülə-gülə dedi ki, sən gedib məndən şikayət edirsən, amma bilmirsən ki, başını hansı qapıya döyürsən. Sonra təhqiredici sözlər işlədib telefonu söndürdü”.

Həmsöhbətim deyir ki, sentyabrın 1-də saat 9-da xidmət etdiyi hərbi hissədə növbəsini təhvil verərək, evə qayıdarkən MTN əməkdaşlarının hücumuna məruz qalıb: “Evimə gələndə yaşadığım binanın ətrafında MTN əməkdaşları tərəfindən saxlanıldım. 10-15 nəfər olardı. Üstümə cumduqları zaman onlara müqavimət göstərdim. Sonra mənə bildirdilər ki, biz MTN əməkdaşlarıyıq. Bundan sonra əllərimi qaldırdım, dedim ki, müqavimət göstərmirəm, nə sözünüz var, deyin. Onlar dərhal üstümə töküldülər, əllərimi qandalla bağlayıb, başıma torba keçirdilər, təpiklə, dubinka ilə vura-vura məni bir maşının “baqaj”ına qoydular”.

N.Ağayev deyir ki, MTN əməkdaşları ona hücum edən zaman onlardan nə üçün saxlanıldığının səbəbini soruşub: “Onlar mənə yaxınlaşanda sual verdim ki, nə istəyirsiniz? Dedilər, içəridə səni başa salacağıq ki, nə istəyirik. Həmin vaxt mən ancaq onu fikirləşdim ki, həmin qadına görə saxlanılmışam. Çünki həmin qadın açıq şəkildə demişdi ki, məni tanımadan gedib şikayət etdin, sənin başına oyun açdıracam. Odur ki, məni həbs edən MTN əməkdaşlarına da bildirdim ki, əgər saxlanılmam bu məsələ ilə bağlıdırsa, məlumunuz olsun ki, bununla bağlı artıq DİN-ə rəsmi müraciət etmişəm. Onlar mənə söyüşlə dedilər ki, sənin də nəslini, şikayət etdiyin polisin də...”

Nizami Ağasiyevin dediyinə görə, gözləntisinin əksinə olaraq MTN-də həmin qadınla bağlı ona heç bir söz deyən olmayıb: “Məni MTN-nin “podval”ına salandan sonra nə nömrə, nə də qadın barədə heç bir söz olmadı. Vəli Ələsgərov qabağıma bir boş vərəq, bir də qələm qoydu ki, “bura İŞİD əməkdaşına agentlik etdiyini və vəhhabilərlə əlaqədə olduğunu” yaz. Ancaq mən bu yaşıma kimi nəinki hansısa İŞİD əməkdaşı haqda, hətta heç eşitməmişəm ki, Naxçıvanda kimsə vəhhabidir. Odur ki, dediklərini yazmadığım üçün məni döyür, söyürdülər. Hər dəfə də 3-4 nəfər olurdu, hamısı da maskalı. Onlar ancaq Vəli Ələsgərovun özü ilə gəlirdilər. İçəri daxil olurdular, Vəli Ələsgərov sual verirdi ki, yazırsan? Deyirdim ki, yazmıram. Başlayırdılar məni döyməyə. Ayaq dırnaqlarımı, barmaqlarımı sıxıb qırdılar, qabırğamı vurub batırmışdılar, üz-gözüm də zərbə izlərindən qapqara idi. Dubinka ilə, dəmirlə, trosla, təpiklə, yumruqla vururdular və pis söyüşlər söyürdülər.

Vəli Ələsgərova bildirdim ki, siz məni kiminləsə səhv salırsınız. Maraqlanın, görün mən necə xidmət etmişəm, ondan sonra deyin ki, “mən vətən xaini olmuşam”. O, mənə sual verdi ki, sənin adamın kimdir ki, belə danışırsan? Dedim ki, mənim heç bir adamım yoxdur, mən ancaq Allaha güvənirəm...

Keçmiş nazir maraqlansaydı, bilərdi ki, mən 10 ilə yaxın Ağdam döyüş bölgəsində xidmət etmişəm, müəyyən döyüş tapşırıqları yerinə yetirmişəm, əsir gətirmədə, Tərtər əməliyyatında iştirak etmişəm. Bir çox əsgər və zabitlərimizi yaralı vəziyyətdə minalanmış sahədən çıxarmışam. Cənab prezident tərəfindən 4 dəfə medalla təltif olunmuşam. Bundan başqa pul mükafatı verilib. Mən bunları əsas gətirib Vəli Ələsgərova deyirdim ki, məni vətənə xəyanətdə ittiham etməklə səhvə yol verirsən”.

N.Ağasiyevin sözlərinə görə, “İŞİD agenti olması”nı yazılı etiraf etmədiyindən keçmiş nazir onu ailə üzvləri ilə hədələyib: “Vəli Ələsgərov mənə dedi ki, yazmayacaqsan? Dedim, yox. Bundan sonra dönüb yanındakı işçisinə dedi ki, gedin Təbriz 1, ev 55-dəki qadını götürüb, gəlin bura. O, mənim yaşadığım ünvanı nəzərdə tuturdu. Bu səbəbdən dedim ki, əgər mənim ailəm bura ayağını qoyarsa, həmin dəqiqə özümü öldürəcəm. Sonra ona dedim ki, Allaha and olsun səhv edirsən. Vəli Ələsgərov telefonunu mənə uzadıb dedi ki, zəng vur Allah gəlsin, görək kişidir, ya arvad”.

Nizami Ağasiyev deyir ki, 2015-ci il sentyabrın 2-də MTN-dən xidmət göstərdiyi hərbi hissəyə belə bir məlumat veriblər ki, guya o, mülki formada hansısa imkanlı qadının evində tutulub: “Bunlar məni həbs edəndə guya, bilməyiblər ki, mən hərbçiyəm. İddia ediblər ki, hərbçi olduğumu ikinci gün boynuma almışam. Bu yalanlarını da ört-basdır etmək üçün mənə dedilər ki, ya çıxandan sonra gəlib arvadını da burdan çıxaracaqsan, ya da biz hərbiyə nə məlumat vermişiksə, hamısını təsdiqləməlisən. Mən heç bir sanksiya, heç bir əsas olmadan, qanunsuz yerə həbs olunduğumu və içəridə mənə olmayan böhtanlar atıldığını nəzərə alıb, fikirləşdim ki, bunu edirlərsə, ailəmi də incidərlər... Mən ayın 2-də gecə Hərbi Polis İdarəsinin rəisi tərəfindən MTN-nin “podval”ından çıxarılmışam. Hərbi Polis İdarəsinin rəisi mənim yanımda cənab komandanımız Kərəm Mustafayevə məruzə elədi ki, Nizami Ağasıyev mülki formada deyil axı, hərbi formadadır. Telefonu yerə qoyandan sonra mən sual verdim ki, necə yəni mülki formada deyiləm?! Hərbi polisin rəisi mənə dedi ki, bizim komandana sənin mülki formada, vəzifəli bir adamın qadını ilə evdə tutulduğun haqda müraciət olunub, mən də ona görə məruzə elədim ki, axı mülki formada deyil, hərbi formadadır”.

Keçmiş hərbçi deyir ki, MTN əməkdaşları tərəfindən hədələndiyindən sözügedən informasiyanı təkzib etsə də başqa heç bir suala cavab verməyib: “Mən orda hərbi polisin rəisinə bildirdim ki, yalandır. Əlavə suallar verəndə danışmadım, çünki ailəmi MTN-ə aparacaqlarından qorxurdum. Fikirləşirdim ki, yəqin məni cənab komandanımız qəbul edər, bu zaman hər şeyi ona açıb deyərəm. Mən ondan başqa heç kimə inana bilməzdim.

Səhərisi günü hərbi polisin rəisi gəlib mənə dedi ki, Ağasiyev, sənə bəd xəbərim var. Dedim nədir? Dedi səni ordu sıralarından tərxis edirlər. Mən inanmadım. Çünki əksinə, mən belə fikirləşirdim ki, böhtanla tutulmağıma, içəridə döyülüb təzyiq altında saxlanılmağıma baxmayaraq, MTN-dən vətən xaini kimi çıxmamışamsa, yəqin komandanım məni daha çox istəyəcək. Ancaq gözlədiyimin əksinə məni Şahbuzdakı N saylı hərbi hissəyə gətirdilər. Zabit, əsgər heyətini meydanında düzdülər, məni çıxardılar qabağa və dedilər ki, zabit şərəfinə xələl gətirdiyi üçün rütbəsi alınır. Hətta əlavə olaraq onu da dedilər ki, ordu komandiri cənab Kərəm Mustafayevin əmri ilə şəxsi heyətin qabağında formanı soyunub, sonra çıxıb getməlisən. Bunun ardınca məni şəxsi heyətin qarşısında soyundurdular və o vəziyyətdə ayın 3-də ordudan tərxis etdilər”.

(Ardı var)  Ayxan İLDIRIMTÜRK, hurriyyet.org