RF Dövlət Duması və XİN-ində görüş

X Diplomatik Seminarın iştirakçıları Rusiya Federasiyası Dövlət Dumasını və Xarici İşlər Nazirliyini ziyarət etmişlər.

5 iyun 2017-ci ildə A.M.Qorçakov adına İctimai Diplomatiyaya Dəstək Fondunun təşkilatçılığı ilə X Diplomatik Seminarın iştirakçıları Rusiya Dövlət Dumasının sədr müavini Pyotr Tolstoy və deputat Dmitri Novikov ilə görüşmüşlər.

Pyotr Tolstoy bildirmişdir ki, xaricdə Rusiyanın necə bir ölkə olduğunu kifayət qədər anlamırlar, amma yaxın zamanda baxışlarda köklü dəyişikliklər baş verəcəkdir. Deputat Dmitri Novikov isə Rusiya Dövlər Dumasının iş prinsipləri barədə danışmışdır.

Görüş iştirakçıları Avrasiya qitəsində gedən siyasi proseslər barədə suallar vermişlər.

Görüşdən sonra iştirakçılar Rusiya Dövlət Dumasının binasına ekskursiya etmişlər.

Elə həmin gün Seminar nümayəndələri RF XİN rəsmi nümayəndəsi Mariya Zaxarovanın brifinqlər keçirdiyi zalda olmuş, onlara XİN nümayəndələri tərəfindən diplomatik məsələlərlə bağlı geniş məlumat verilmişdir. Görüş maraqlı diskussiya ilə müşayiət olunmuşdur.

RF Dövlət Duması və XİN-ində keçirilən bu görüşlərdə dünyanın müxtəlif ölkələrindən olan gənc siyasətçilər və diplomatlar, o cümlədən Avrasiya Hərəkatı Azərbaycan təşkilatının üzvləri iştirak etmişlər.