Xoş ətirli qızıl gülüm,
Yağmur kimi, sən gözəlsən.
Ləçəyində şəbnəmlərlə
Qəlb oxşayan bir qəzəlsən.
Qatardan qalma durnasan,
Çiskinli fəsli-payızda.
Payızı gözəlləşdirən
Müşk iyli, qızıl xəzəlsən.
Sənsiz həyat bir cəhənnəm,
Səninləsə bir cənnətdir.
Ruhum mənim, gözəllikdə,
Sən mələklərdən əzəlsən.
Gündüz şəmssən, gecə qəmər,
Həmişə fəsli-baharsan.
Küskünü tərk edib getsən
Onun üçün sən əcəlsən.
***
Qəhr edib dərd-qəm əlindən, dili-bican olmuşam,
Düşmüşəm gen cənnətimdən, tərki-canan olmuşam.
Zülm edib yarım məni salmış bəlalət dəştinə,
Qüsseyi qəmdən yazan qəmkeş qəzəlxan olmuşam.
Qalmayıbdır bir kəsim ki, halimi sorsun mənim,
Vəsli yarə yox ümidim, çəşmi-giryan olmuşam.
Sızlaram sübhü-məsa fəryad edən bir ney kimi,
Neylədim ki, qüssədən çaki-giriban olmuşam.
Getməyin vaxtı çatıb, dostlar, halallıq istərəm
Küsküna, köç eyləyən karvana sarvan olmuşam.
***
Mən bilməz idim ki, belə bir gün gələcəkmiş,
Ruhum kədəri, dərdi atıb bir güləcəkmiş.
Viranə könül xaneyi-abad olacaqmış,
Göz yaşlarımı dərdə əlacım siləcəkmiş.
Bir qönçə gülü etdi sirab, çeşmeyi-didəm,
Dərdimə əlac olduğunu gül biləcəkmiş.
Hər gün anıram ol bağı ki, bağ gülə həsrət,
Ol bağda bitən, qönçə çiçəklər solacaqmış.
Bəsdir dəxi Küskün, eləmə bunca ahu-zar,
Hicran odunu söndürən ol yar olacaqmış.
Комментариев нет:
Отправить комментарий