“Xalq şeirləri” silsiləsindən

                                             Elnur Astanbəyli

Almadan küsən

gün axşama döndü quşlar yuvaya döndü

sən mənə dönmədin… küsdüm

bir gözüm telefonda bir gözüm qapıda

alma yerinə barmağımı kəsdim

barmağımı kəsdim… qan gördüm qorxdum

bağırmaq istədim qonşunun xətri için susdum

saat səkkiz oldu doqquz oldu on-onbir oldu

artıq gəlməzsən dedim… küsdüm

qapım döyüldü güllə kim atıldım yerimdən

küləkmiş… üşüdüm titrədim əsdim

sən bir də o biri gün axşam gəldin

bu dəfə də almadan küsdüm küləkdən küsdüm

oktyabr, 2009

   ***

   OL!

 

   söyləməyə

   dilim yox,

   həqiqətlər

   çox acı.

   nə qardaş var,

   nə bacı,

   qar, mənim

   qardaşım ol

  

   ağca daş,

   qaraca daş.

   yekə daş,

   balaca daş.

   həm cavan,

   həm qoca daş,

   daş, mənim

   başdaşım ol

 

   tanrının

   yeri uca,

   əl uzatmaqla

   yetməz.

   kimsə

   mənimlə getməz,

   yol, mənim

   yoldaşım ol…

 

***

N saylı silsilə

1.

burda

səndən neçə şəhər neçə kənd uzaqda

neçə nəğmə

neçə misra neçə bənd uzaqda

darıxmaq öyrədir mənə

qarışqalar böcəklər

bir azdan kölgəyə çəkiləcək adamlar

və darıxmaq içəcəklər

burda darıxmaq saçır günəş

güllər darıxmaq qoxuyur

darıxmaq yağır yağışlar

quşlar darıxmaq oxuyur

sazlar darıxmaq ötür

sular darıxmaq axır

bir də qıvrım saçlı bir qız uşağı

mənə darıxmaq-darıxmaq baxır

burda hər səhər, gülüm

öz gözlərimlə görürəm

quşların yuvadan

darıxmağa çıxmağını

burda bir az da tez tökür

ağaclar darıxmağını

2.

bilmək istəsən, gülüm

burda havalar soyuq keçir

və yanımdan soyuq adamlar keçir

nə gözlərdə sevinc var

nə dodaqlarda təbəssüm

bəs nə var deyə soruşsan

uzaqlıq var ögeylik var

mənsə o qədər yalnızam

bilmirəm kimnən barışım

bilmirəm kimdən küsüm

bilmək istəsən, gülüm

burda çiçəklər tez solur

yarpaqlar tez saralır

ağaclar tez üşüyür

tez sürüşür başından

dağların duman şalı

hə bir də ki buludlar

və qədəhlər tez boşalır

Saat gecənin dördü…

indi nə içmək nə də

mesaj atmaq vaxtıdı

bu günlük yetər, gülüm

artıq yatmaq vaxtıdı

3.

sabahın xeyir gülüm

burda hər səhər günəş

səni xatırladır mənə

istər payız istər yaz

işığı sənin qədər uzaq

istisi sənin qədər uzaq

amma yenə də, gülüm

sənsiz və günəşsiz olmaz

sənsiz olmaz bilirəm

amma yenə də istərsən

nə sən durub gəl, gülüm

nə də ki mən gedəlim

sən orda iç mən burda

yolları sərxoş edəlim