Tezliklə yağış yağacaq...

Əfsanə Laçın

                Yağacaq...

Vaxt var idi

göydən yağış yağırdı.

Damlalar süzülürdü

yarpaqların üzündən.

Onda tanrı mehribandı...

Dedim:qoymayın yağış dayansın!

Amandı.

Dayandı...

Sonra leysan yağdı

dünyanın rəngini yuyub apardı,

daş yağdı

dünyanın başı yarıldı.

Indi pərvanə yağır

göyün üzündən.

Deyəsən tanrı bizi bağışlayır

yavaş-yavaş.

Tezliklə yağış yağacaq...

                Qayıdacam

Sabah

günəşin sacağına dırmanacam,

göyə qalxacam.

Gecə aydan sallanacam,

buludlara lay-lay çalacam,

ulduzların qucağında yuxuya dalacam

səhər küləklə qayıdacam...

                Çəpər

                Bir körpə gülüşü yetər mənə

                qəm buludu ürəyimdən dağılsın.

                Bir körpə səsi bəstir mənə

                dərdim parçalansın.

                BIr körpə köksümdə uyusun,

                yaralarımın sızıltısı dayansın.

                Bir körpə qoxusu gəlsin

                təbəssümüm geri qayıtsın.

                Barmaq sayı çoçuk göndər

                Allah mənə

                kədərlə aramda çəpər salınsın.