NƏ AZ, NƏ ÇOX...

İmarət Cəlilqızı

Deyirlər ki, ölüm haqdır
Ondan nə qaç, ondan nə qorx,
Gəlişinə hazır dayan,
İçindəki qorxunu boğ.

Ömür daim axan çaymış,
Sonu məchul bir dünyaymış,
Bu deyil, o dünyadaymış
Aradığım müqəddəs haqq.

O dünyanın Allahı nə,
Savabı nə, günahı nə,
Savaşmağa silahı nə?
Dilmi, sözmü, yoxsa yay-ox,


İstəyəndə ölə biləm,
Öləndə də gülə biləm,
Ölməmişdən bilə biləm,
O dünyada nə var, nə yox.

Ötüb keçir günüm, ayım,
Vədə çatır, günü sayım,
O dünyaya mənim payım-
On arşın bez--nə az, nə çox...