İşıqforda çaşan külək

Emin Piri

Sevgi

Əllərin ovcumda, 
ovcumda dünya
suya tilov sallayıb
əllərindən 
göyərçinə dən atmaqdı
sevgi.

Körpü üstündə
dalğalanan saçlarında 
əllərimin balıq kimi üzməsi,
sinənə sıxılıb
gözlərində qağayıların uçuşunu
seyr eləmək,
dalğalı dənizdə boğulub
ölməkdi sevgi.

Fanatı olduğun komandanın
son dəqiqə vurduğu 
tarixi qoluna
sevinərək bir-birinə 
sarılmaqdan da yaxındı
Sevgi.

doğum evi önündən
keçərkən
sevdiyinin gizli təbəssümünə 
dodaqaltı qımışmaqla 
cavabındı sevgi.

Gecə yarısı körpə qığıltısına
oyanıb
səhərəcən növbəylə 
beşik yelləmək...
... yuxunda belə
“ başqasi daha çox sevə bilərdi,
özgəsini daha artıq sevə bilərdim”
deyə bilmədiyin 
sözdü 
sevgi!.. 

İşıqforda çaşan külək

Döngələrdə gizlənib
oğrun-oğrun 
baxır qızlara külək.
Kiminin taleyini,
kiminin telin aparır. 

Tutub ətəklərindən
şit-şit zarafatlaşır,
əl atıb saçlarına 
yolur
və gülür külək.

Bu külək canından çıxıb
harda can verəcək bilmir.
adamlar küləkdən qaçıb
hara gedəcək bilmir.

Işıqforda gözləyib
baxır 
havalı keçən maşına
necə keçsin küçənin 
bu başından o başına.

Yorulub əldən düşür,
şəhərin gözündən düşür,
o qədər qıza ilişib 
utandığından
dağlara qaçır külək.

Toylarda oynayan xanımlar kimi
yellənir
sünbülü dolmuş zəmilər
bu küləyin havasına.

Yayın istisi vurub başına 
üz-gözü tər içində
payızçün yaman darıxıb.
oturub ağac kölgəsində
özünü küləyə verir
bu külək.