İçimdə bir sakitlik var

Xəyalə Sevil

İçimdə bir sakitlik var,
Payız vurmuş yarpaq kimi
Xəzan-xəzan tökülürəm.
Əllərim daş ağırlığındadı,
Qaldıra bilmirəm.
Bətnimdə bir kimsəsizlik, tənhalıq,
Saldıra bilmirəm.

Zəyifcə külək əsir,
O üzümdən, bu üzümdən vura-vura,

“Özünə gəl” deyə-deyə
Sirkələyir, sirkələyir.
Saçlarım tərpənir, ancaq.
Xəyallarım azadlıqda
Məhəbbətim qara sancaq...

Qızımın səsi gəldi otaqdan,
Deyəsən, durub yataqdan.
Yaxşı ki, dünəndən ulduzları
Yığmışdım qızımın gülüşünə.
Birazdan,birazdan atacam
Göyün qaralmış üzünə.