Hüseyn Cavid - Eşq atəşi can yıxıyor...

***
Eşq atəşi can yıxıyor,
Ürəkdən qanlar axıyor.

Tale mənə yan baxıyor,
Həm gülümsər, həm ağlarım.

Gönül həp sızlar, həp inlər,
Xəzan fəryadını dinlər.

Anıldıqca keçən günlər
Həm gülümsər, həm ağlarım.

Hər səfada cəfa buldum,
Açmadım saraldım-soldum.

Sərbəst ikən əsir oldum,
Həm gülümsər, həm ağlarım.


***
Yaş zindanlar yuvamız,
Fəlakət aşinamız.

Ordular yıxan qurşun,
Olmuş bizim qidamız.

Arkadaş, göz aç, aman,
Qalx ölüm uyqusundan.

Zülmə çox əydin boyun,
Çox əzildin, qalx, oyan!

...Arkadaş, ayıl bir an,
Haqsıza olma qurban.

Yetər, miskinlik yetər,
Qalx! Oyan, oyan, oyan!..