“METOFİZİK MƏNZƏRƏLƏR” SİLSİLƏSİNDƏN

Adil Mirseyid poeziyasından ən yaxşı seçmələr bizdə!

                            *         *           *

göydə ayın görünməyən tərəfindən

mosmor bir rüzgar əsəcək

rüzgar yağmur gətirəcək

sənə mənə ərmağan

hüzün nəğmələri oxuyacaq

saatların əqrəblərində çırpınan zaman

ayın görünməyən tərəfindən əsən mosmor rüzgarla

pozulacaq ruhumuzun göy üzünə çəkdiyi cizgiər

bilirəm artıq zamanın gerçək üzünü gizlədir bizdən

baxdığımız güzgülər.

                           *         *           *

bütün umudsuzluqları bir qaya üstündən atdım dənizə

qağayılarla qanad–qanada uçdum uçdum

uzaq limanlara üzən bir gəminin havasına

gəmi üzüb getdi mən burda qaldım

bir səs gəldi hardasa çox uzaqdan

bəlkə uşaqlığımdan bəlkə də ürəyimdən

dalğalandı birdən birə gözlərimin məxməri

uzaq limanlara üzən bir gəminin havasına

daha bel bağlamıram mən ömrün vəfasına

                      *           *              *

ölümün xeyrinə işləyir bütün saatlar

uçan quşlar duyur saatların sirrini

amma saatlar gizlədə bilmir zamanın çılpaqlığını

zaman bakirə deyil artıq

artıq ölümlə sevişir zaman

dodağında cakonda təbəssümü

ay işığı parıldayır çılpaq zamanın alnında

tər və qan qoxusu var siyah atlas qaranlıqda

sən də uçub getdin salvador dali

bəs kim anlatacaq zamanın sirrini

kim söyləyəcək dünyanın ən böyük yalanını

kim çəkəcək mənim gerçək rəsmimi                                                                                                                                    sən də yoxkən bu dünyada

yenə aynalar aldadacaq gözlərimin içində bəslədiyim ölümü

                                             Adil Mirseyid