Həni Məşi! (Talışca şeir)

Mirfayaz Likməkani

Betıəti dodi zındəm...
Əmon! Əmon!
Marde çoke, rəxdəş şedəş,
Betı mande
jiye-jiye bənə con doy
con beşedəni hiç zəmon.
Çumçuki çaş ıştı şəə roonsəye,
Umu mandə qasti oməy
Qasti ujən oqarde əv
qasti ujən voş dəmande
Tələkə dəvarde ı şəv,
Ə sioçəş, ə siobəv
ujən dımınə qəvbəqəv
qasti ujən sıxan kaje-
xosə rujon ujən vaje.


Im umuon bin ki mıni
jiovındə, nığo doydə,
Hiç zınedəj betıəti
bəmı çoknə cəfo doydə??

Şuk bə Xıdo imon həni
Tıni mıku əbə ruji
rujqari jıqo nıbaşe
Əv oqardo dumo həni!

Əmo ujən, əmo ujən.. bəçımı con,
Tars-larz eqnə
Im qemıjon bəfomand ni,
qa qiləvo, qa siovo,
sarde i ton, qame i ton.
Bə qam beşe
holətım ni,
taqətım ni.
Çumçuki kardəşe nimcon
mınış ıştı betıəti.
Əve tarsdəm, ım siovon
bıbən tıni cokən mıku,
şodən mıni bə sioçol
Diəro oğəton tıku..

Çaşi və varde zındənim
betı mande,
Az pidəme oxey mənzıl
dıtı mande.
Betı mandim
komrə xoki ebəkardem
az bəştə sə?

Əve ısə, Əve ısə
tı ğoym bıqət çımı kəşi
Dəvardəmon siovonku.
Çı avonku-
bı nezono beşənine çəmə həşi,
bovə kardəm.
Tı ğoym bığət çımı kəşi,
lovə kardəm
həni məşi, həni məşi!!