Əyrilərin arasında

Hafiz Rəhim


Zaman-zaman axdı sular,
Düzlər yenə düzdə qaldı.
Gözlər zilləndi göylərə,
Əllər yenə dizdə qaldı.


Ayaqları dəyənəkdi,
Əlləri qabar düzlərin.
Hər vaxt sümsük tula kimi
Ehtiyac tapar düzləri.


Mat qalıbdır bu gərdişə,
Bəlkə də göydən düşüblər.
Bu havaya uyuşmurlar
Taqətdən-heydən düşüblər.

Qəzəb də var, giley də var,
Gözlərinin qarasında.
Əriyirlər gilə-gilə
Əyrilərin arasında


Quba