HƏYAT ƏLEYHİMƏ İŞLƏYİR
taleyin əliylə qara cildlənmişşəkil albomudur
bakı gecələri
qaranlığın bağrına sancılan
bütün şəkillərdə
qıllı kişilər şellənir
yekəqarın arvadların yanında–
yenə səhər
köks ötürəcəklər
matan xanımların ardınca...
qadınsız şəkillərdə
sifəti əyiş–üyüş kişilər var–
adam sərxoş olanda unudur təkliyini
boşalanda...
yenə səhər
bütün axşamı içməkdən
əncirə dönmüş birisi
metroya yaxın səkilərin birində
ötənləri fitdəyəcək
qoca balıqçı həvəsiylə
hansısa fınış xanım
səsə düşər
geri boylanar
qımışar qotur əncir
-eyy… gəl səni
əllərimlə tanış edim
saçların darıxmaz yəni
yolunu dönmədən
əllərini saman saçlarına
uzadar qadın
bəyaz ayaqlarında
gözəlliyin davamlılığı
daha bir qarış artar...
qəzaya uğrayar kişi baxışları
ipək donun ətəklərində
gülümsəyir fınış xanım
yanından ötən kişiyə
qalstukundan bir qarış yuxarıda bitən
sahmanı içində itən kişiyə
büzüşüb
yuvarlaq aha dönər qotur əncir
-həyat əleyhimə işləyir...
TÜRKÜ
bizlər ağlamaqçün doğulmamışdıq
nələr yapdılar nələr yapdılar
ağlatdılar
silah çiyinlərimiz atılmağa hazır
bizlər yıxılmaqün doğulmamışdıq
necə yıxdılar necə yıxdılar
uçuq divarlara sıxdılar
bizlər sevişməkçün doğulmuşduq
sevmədilər
yaşamaqçün doğulmuşduq
qıymadılar
offff offf
bizi öldürməkdən doymadılar
Zahir Əzəmət
Комментариев нет:
Отправить комментарий