Himmlerin 28 iyul 1941-ci il əmrində deyilirdi ki, müqavimət göstərən istənilən yaşayış məntəqəsi aviasiya ilə bombalanmalıdır. “İrqi, milli və fiziki cəhətdən mükəmməl olmayan” Sovet adamlarını qırmaq, qadın və uşaqları işləmək üçün Almaniyaya yollamaq, mal-qaranı və ərzağı isə ordu üçün konfiskasiya etmək planlaşdırılmışdı. 1942-ci ilin martında Hitler işçi qüvvəsi komissarı Friç Zaukelə əmr vermişdi ki, 15 yaşından 35 yaşına kimi 400-500 min ukrain qadını alman ordusunun təminatı üçün təsərrüfat işlərinə cəlb olunsun. Zaukel göstəriş vermişdi ki, 31 dekabr 1942-ci ilə kimi 225 min, 1 may 1943-cü ilə kimi də əlavə olaraq 225 min ukrain qadını Almaniyaya göndərilsin. İşğalın sonuna kimi hitler yırtıcıları Sovet ərazisindən 2,8 milyon dinc sakini aparmışdılar. Yer üzünün əsas zinəti- slavyan insanları eşolonlarla Almaniyaya daşınırdı. İnsanlar öz doğma yurdlarını qoyub qaçır, aclıqdan, soyuqdan və xəstəliklərdən tələf olurdular. İşğalçılar onların evlərini yandırır və əmlaklarını müsadirə edirdilər.