Rus xalqına qarşı ən ağır tədbirlər həyata keçirilməliydi. Nasist rəhbərliyi rusları mədəni və mənəvi deqredasiyaya uğratmağı ən vacib vəzifələrdən biri kimi görürdü. Nasist instruksiyasına əsasən, “yerli əhalinin yol hərəkəti qaydalarından başqa heç bir bilgisi olmamalıydı”. “Ost” planına görə işğal olunmuş ərazilərdə slavyanlara 4-cü sinifdən yuxarı təhsil verilməməliydi. Hitlerin işğal olunmuş ərazilərlə bağlı 23 iyun 1942-ci il direktivində deyilirdi: “Yerli əhaliyə elə bilik vermək lazımdır ki, yazıb oxumaqdan başqa heç nə bilməsinlər. Məktəbləri pullu etmək lazımdır ki, təhsil ala bilməsinlər. Dərs proqramını elə formaya salmaq lazımdır ki, məktəbli mümkün qədər az savadlansın. Bizimçün sərfəli olardı ki, onlar ümumiyyətlə danışa bilməsinlər, bir-birlərini barmaqlarının köməyi ilə başa salsınlar. Heyf ki bu mümkün deyil”.