Sənin gözündəki o qüssə, o qəm
Mənim ürəyimi məskən seçibdir.
Bulaq tək gözündən süzülən o nəm,
Qəlbimdə bir şırım, bir yol açıbdır.
Zamanı sevgiylə cüt aşardıq biz,
Bir eşq sevdasında alışardıq biz.
Daha dünənləri dəlilər kimi,
Səbəbsiz küsərdik, barışardıq biz.
İllər sevgimizə rəngini qatmış,
Xırda fidanlar da qol-budaq atmış.
Səni Nənə kimi bir ucalığa,
Məni də bəxtəvər bir Baba yapmış.
Üzürük arzular ənginliyində,
Tanrıdan bir ömür "borc" istəyərək.
"Yapışıb ümüdün bəxt zəncirindən"
Sabah müjdəsini biz gözləyərək.
Bəs nədir səbəbi qəmin, qüssənin?
Bu qədər sıxan, nə, qəlbini sənin?
Yanağından axan o göz yaşların,
Hansı acılara cavabdı sənin.
İnsanlıq yol gedir zamanla bəlkə,
İnsan yorulsa da yorulmur zaman.
Qurtulaq qüssədən, kədərdən birgə,
Gözünün yaşını sil yanağından...
Комментариев нет:
Отправить комментарий