Siyasi erotika: Kapitalizmin adamları

Gül Təkin

Azərbaycanda "siyasi erotika"nın əsasını qoymuş adamam... Siyasi pornoqrafiya da demək olar...

İnteqrasiya

Əvvəlcə "Avropa dəyərləri",

sonra Avropa dəliyi...

Əvvəlcə bu "dəyərlərdən"

basıb-bağlayırsan,

Avropanın ora-burasini yalayırsan,

nəhayət 

dəliyini tapırsan

dilinlə...

Sonra 

o dəliyə girirsən 

bütün varlığınla -

keçmişinlə,

var-yoxunla...

İşdir, o dəliyə girməyə 

"dəliyin çatmasa",

girənlərin ayaq barmağını yalayırsan

heç olmasa...

Necə olsa,

Avropaya dəymiş ayaq qoxusu 

bi başka...

2013

Kapitalizmin adamları -

sistemin qardianları...

Dövlət faşist, biz faşist...

Dövlət bizi döyür, biz uşaqları...

İtaətə öyrətdilər onlar bizi,

biz də

doğduqlarımızı...

Nə ana var bu sistemdə, nə ata,

nə qadın var, nə kişi -

hamısı zombi, 

hamısı faşist,

hamısı

dəlik-deşik həşəratları...

Ən yaxşı olmaq dindarlığı...

Allaha ən yaxın olmanın rahatlığı...

Sıradakıların önünə, 

üstünə çıxa bilmək peşəkarlığı...

Geridəqalmışların irəlisində 

dura bilmək bacarığı...

Allah qatında sözünü ən tez keçirmək, 

işin keçənlə işini ən sərrast bitirmək...

Ən olmaq...

Ən üst, ən ön, ən orta, ən mərkəz...

Ən gen, ən böyük, 

ən yüksək...

Allaha özünü ən mömin göstərmək,

ən pak...

İnsana ən gözəl görünmək, 

ən saf...

İtə ən mərhəmətli, 

qurda ən böyük nifrətlə...

Ən yaxşı olmaq dindarlığı...

Yarışan olmaq, yarışda olmaq,

yarışdıran sistemlər qurmaq,

yarışlarda birinci olmaq...

Dinlər qurmaq...

Orada ya ən yaxşı dindar,

ya da ən qatı kafir olmaq yarışı...

Mal yarışı, ad yarışı,

at yarışı...

Ən gözəl, ən çirkin,

ən yaxşı şair,

ən yaxşı nökər,

ən yaxşı şah...

At oynadanlar, it oynadanlar,

xoruz boğuşduranlar,

insan yarışdıranlar...

Nə Allaham, nə dindaram...

Nə ən qüdrətli,

nə ən gözəl, 

nə ən üstdə,

nə ən yaxındayam...

Nə də qovhaqovdayam...

Yarışmaram, yarışdırmaram,

bunu insana yaraşdırmaram...

Hamıya ehtiyac duyuram,

hər yerdə hər kəsə...

Ürəyimi, gözümü oxşayan 

sıra nömrəsi olmayan hər kəslə...

2014

Absurd

Hiss olunan, 

dərk olunan bütün həqiqətlərin

öz həqiqiliyi var...

Hər həqiqətin öz ömrü, öz yolu,

şirinliyi, acılığı...

Gözəli, çirkini,

qəbul olunanı, 

olunmayanı...

Hər insan həqiqətində

bir az da yalan var,

dərk elədiyi, hiss elədiyi...

2015