Ələddin Əzimli - Sənli günlərimə

Sənli günlərimə

Gedər,

gedər bu qatar.

Ürəyimi

və sənli günlərimi aparar.

Əsər, 

əsər bu külək.

Və sənin ətrini,

sənin səsini

Mənə çatdırar

Qibləmiz

Yatanda 

Üzünü qibləyə çevir.

Çünki Allah

Ona

və onun evinə tərəf

baxanları sevir.

Allahın

evi çoxdur,

Birdən çaşarsan.

Qibləmiz Məkkədədir,

Kəbədir.

Ona tərəf baxarsan.

Sakitcə uyuyar,

yatarsan!

Yuxu

Gecənin yuxusu 

şirin olur,

dərin olur.

Gündüzün yuxusu

az olur,

dayaz olur.

Bəs 

ölüm yuxusu necə?

Bunu bilmək çətindir.

Bu sualın cavabını

Gərək dünyasını

dəyişəndən soruşasan.

Onu dəqiq bilmək üçün

mütləq bu dünyadan

köçənlərlə qovuşasan.

Onlar ilə

qaynıyasan, qarışasan.