Səndən sənə qaçmaq

Sayman Aruz

Xətrimə dəyirsən zalımın qızı!

Hər gün bircə addım uzaqlaşırıq

Hər gün gələcəyin qorxularıyla

Yataqda yol gedib qucaqlaşırıq!

Gözündə sevgi yox, vicdan əzabı

Əlində bir soyuq inkarın yükü

Mənə baxmaqdansa yerə baxırsan

Mənsə kefli-kefli, boynu bükülü...

Sözlərin ox kimi tullanır mənə

Artıq sevə-sevə danışanmırsan.

Keçmişdə bir küsüb min barışardın

İndi bircə dəfə barışanmırsan.

Bilsəydim bu qədər sevməzdim səni

Gedib vurulardım qayaya, daşa.

Sel kimi axardım dərədə, düzdə,

Çay kimi vurardım ömrümü başa.

Sənin qaş-qabağın, mənim heyrətim

Tufanın öncəki süküt, faciə.

Yadıma gəlir ki, biz gülüşərdik

Demə alışırdıq bu səssizliyə!

Çıxıb gedəcəyəm harasa bir gün,

Çiynimdə dərdlərin gülüşmə səsi...

Sənə sığınmağın dadı başqadır

Səndən sənə qaçmaq olardı kaş ki...