GEDƏK OĞLUM...

MİRZƏ SAKİT

(oğluma )

Dəng edəcək, o dəng edən, gəl gedək

Gedək oğlum, bu ölkədən, gəl gedək

Çox bəlkə deyirsən, söylə - Bəlkə nə?

Çaqqal şahlıq edir sənin ölkənə

Cəhənnəm mülkündə ağac, gölgə nə?

Çıx günəşə, o kölgədən, gəl gedək

Gedək oğlum, bu ölkədən, gəl gedək

Haqq götürmək nə bəladı, nə yükdü

Haqqsızların bəbəkləri döyükdü

Elə bildim ərk edənlər böyükdü,

Nə sevən var, nə ərk edən, gəl gedək
Gedək oğlum, bu ölkədən, gəl gedək

Yaxşı ki, Tanrı var – Bizə təsəlli

Gəl yapışaq Tanrımızdan beş əlli

Sən cavansan, məndə artıq yaş əlli,

Düş dalımca, bu bölgədən gəl gedək

Gedək oğlum, bu ölkədən, gəl gedək

Məni vətən sevdi, səni də anan

Başqa kimsə varmı, dərdinə yanan

Haqqın cərgəsində yoxdu dayanan,

Orda durma, o cərgədən gəl gedək

Gedək oğlum, bu ölkədən, gəl gedək

Vətən bütov, biz vətənin əzası

Yurd sevənin çox olmalı cəzası

Mirzə Sakit harda olsa yazası

Görk edəcək, o görk edən, gəl gedək

Gedək oğlum, bu ölkədən, gəl gedək