Gömülən şəhər

Dilqəm Əhməd

Gedək bu şəhəri gömməyə

Yuyulmamış,

Quran oxunmamış kimi

Bir damcı göz yaşı da axıtmayaq

Axıtdırdığı günlərə saysın şəhər

Hava buz kəsir

Üşüyəcək yerin altında şəhər

Bir az da o cavab versin

Tanrı suallarına

Bir az da o yansın

Çəkdirdiyi əzablara görə.

***

Cənnət üzü görməyən, şəhərim

Buruqlarla burulan, şəhərim

Qanı, ürəyi, nefti sorulan, şəhərim

Onlar səni

Sən bizi bitirdin, şəhər

***

Məzarını dərin qazacağıq bu gecə

Heç bir xatırlayanın olmayacaq

Sinədaşına bir qərənfil də toxunmayacaq

Tikanlar bürüyəcək hər yanını

Sən orda çürüyəcəksən…

Artıq yoxsan, şəhər…