Əlixan Qaya - Çiynimdə həyatın dərdi

YOL GEDİRƏM

Bu şəhər beynimdə dar ola-ola

Şəhərin darısqal küçələrində

O yana bu yana

Bir tikə çörək arxasınca

Piyada yol gedirəm!

Çiynimdə yüküm həyatın dərdi

Ürəyimdə həyatın ağrıları

Qorxulu fikrimlə

Addım-addım yol gedirəm

Ümidsiz uzun yollarda

Həyatın bir quru gülüşünə

Ürək bağlamışam

Gündüz ayaqlarımla

Gecə fikrimlə

Yol gedirəm

Yol gedirəm

Dayanıb durmaqdan qorxuram axı!

DÜNYA EDAM GÜNÜ

Bu gecə bir səs var, anam!

Yazıq kimdi? Güllələnir

Evinin bucağında

Süzülüb qan göllənir

Öldü nəğmə, öldü söz

Yazıq canım dərdə döz

Ölən kimi baxan göz

Ulduzlara zillənir

Yetim qaldı quş yuvada

Nə günahı bu davada

Balaca quşlar havada

Yarpaq kimi yellənir