Bütün nağıllarda, əfsanələrdə...

Əhməd Cəmil

      Bütün nağıllarda, əfsanələrdə

      Qızlar bir Günəşdir, oğlanlarsa Ay.

      Bütün mahnılarda, xoş nəğmələrdə 

      Dinən bir könüldür, susan min haray.   

      Bütün ulduzların parıltısında                      

      Əlçatmaz bir eşqin şikayəti var.

      Bütün bulaqların şırıltısında

      Ötən bir sevdanın hekayəti var.

      Dünyanın əzəli yaraşığında

      Dünyadan əzizmiş ilk sevgi andı.

      Bütün gecələrin ay işığında

      Sevənlər özünü bəxtiyar sandı.

     

     

      Bütün pöhrələrin xışıltısında

      Daim bir qız qaçar, bir oğlan qovar.

      Bütün meşələrin uğultusunda

      Nigaran bir ana qəlbi ufuldar.

      Bütün mahnılarda, xoş nəğmələrdə

      Dinən bir könüldür, susan min haray...

      Bütün nağıllarda, əfsanlərdə

      Qızlar bir Günəşdir, oğlanlarsa Ay.