Gəl yığ indi gözlərini dillərindən

Emin Piri

İTİRİLMİŞ ƏLLƏR

Görüşəndə

Sevgilisinin əlində

gözü axtarardı

ona veriləcək  gülləri.

Indi

kitabları arasında qurutduğu

Gül ləçəklərində axtarır

Sevgilisinin сəbhədə itirdiyi əllərini.

ALLAH DILƏNIN

Ürəyiniz boşalacaqsa

dünya cənnətə çevriləcəksə,

öldürün,

doğrayın məni.

Sonra tin-tin,

küçə-küçə axtarın.

Qaldırın əlinizi,-

göydən Allah dilənin.

TƏBRIZIN QANLI KÜÇƏLƏRI

Başını sinəmə qoyma,

Dağa dönmüş bu qəlbimdən

görünür Təbrizin qanlı küçələri.

Qana boyanar telin,

qorxarsan,

qaçarsan.

Tutma əllərimdən,

əllərimdə qandal var.

Məftillər

sərhədboyu daram durmuş...

Biləyimdə irin olmuş yarası var.

Didər əllərini,

ağlarsan,

sızlarsan.

Baxma gözlərimə,

neçə namərd baxışı var

bu gözlərdə.

Düşər gözlərin gözlərinə.

Gəl yığ indi gözlərini dillərindən.

Toxunma saçlarıma,-

Hər ağarmış bir telimin

Acısı var, kədəri var.

Yazılmamış tarixlərin

unudulmuş yarası var.

Qırmadıqca qolumdakı qandalımı,

kəsmədikcə biləyimdən məftilləri,

unudulmuş tariximi yazmadıqca,

qəlbimdəki dağları yarmadıqca,

Sevmə məni...

Məni sevmək günahdı!